diff --git a/Data Collected/Odia/IIIT-BH/Monolingual-corpora/vikaspedia.in/vikashpedia_health_odia125.txt b/Data Collected/Odia/IIIT-BH/Monolingual-corpora/vikaspedia.in/vikashpedia_health_odia125.txt
new file mode 100644
index 0000000000000000000000000000000000000000..d6e328c42a13559d67952a1f1368a83d235e129f
--- /dev/null
+++ b/Data Collected/Odia/IIIT-BH/Monolingual-corpora/vikaspedia.in/vikashpedia_health_odia125.txt	
@@ -0,0 +1,139 @@
+ଆଘାତ ଓ ନିବାରଣ
+ମୁଖ୍ୟ ସନ୍ଦେଶ
+ବିଭିନ୍ନ  ଆଘାତ  କାରଣରୁ  ପ୍ରତି  ବର୍ଷ  ୭୫୦,୦୦୦  ପିଲାଙ୍କର  ମୃତ୍ୟୁ  ଘଟେ ।
+ଆଉ  ୪୦ କୋଟି  ପିଲା  ଗୁରୁତର  ଅବସ୍ଥାରେ  ପଡନ୍ତି ।
+ଅନେକ  ଆଘାତ  ସ୍ଥାୟୀ  ଅକ୍ଷମତା  ଓ  ମସ୍ତିସ୍କ  କ୍ଷତର  କାରଣ  ହୁଏ ।
+ଛୋଟ  ପିଲାଙ୍କର  ମୃତ୍ୟୁ  ଓ  ଅକ୍ଷମତା  ପାଇଁ  ଆଘାତ  ହିଁ  ଏକ  ମୁଖ୍ୟ  କାରଣ  ହୋଇଥାଏ ।
+ପଡିଯିବା , ପୋଡିଯିବା , ବୁଡିଯିବା ଏବଂ  ସଡକ  ଦୁର୍ଘଟଣା  ଆଘାତ  ଆଣିବାର  ମୁଖ୍ୟ  କିଛି  କାରଣ ।
+ଏହି  ଧରଣର ଆଘାତ  ଆନୁଥିବା  ଘଟନା  ସବୁ  ଘରେ  ବା  ଘର  ପାଖରେ  ଘଟିଥାଏ ।
+ଏଥିରୁ  ପ୍ରାୟ  ସବୁ  ରୋକାଯାଇ  ପାରିବ ।
+କ’ଣ  କରିବାକୁ  ହେବ ବାପାମା’ଙ୍କୁ  ତାହା  ଜଣାଥିଲେ  ଅନେକ  ଆଘାତର  ତୀବ୍ରତା  କମାଇହେବ ।
+ଯାହା  ଜାଣିବା  ହେଉଛି  ପ୍ରତ୍ୟକ  ପରିବାର  ଓ  ଗୋଷ୍ଠୀର  ଅଧିକାର
+୧. ବାପାମା’  ଓ  ଯତ୍ନକାରୀମାନେ  ଛୋଟ  ପିଲାଙ୍କ  ପ୍ରତି  ଯଥେଷ୍ଟ  ଧ୍ୟାନ  ଦେଲେ  ଏବଂ  ପିଲାଙ୍କ  ପରିବେଶକୁ   ନିରାପଦ  ରଖିଲେ  ଅନେକ  ଗୁରୁତର  ଆଘାତ  ଏଡାଯାଇ  ପାରିବ ।
+୨. ନିଆଁ , ଚୂଲି , ବତୀ , ଦିଆସିଲି ଏବଂ  ବିଦ୍ୟୁତ  ସରଞ୍ଜାମ  ଆଦୀରୁ  ପିଲାଙ୍କୁ  ଦୂରେଇ  ରଖିବା  ଉଚିତ ।
+୩. ପିଲାମାନେ  ଚଢିବାକୁ  ଭଲପା’ନ୍ତି ।
+ତେଣୁ  ଶିଡି , ଛାତ , ଝରକା  ଏବଂ  ଖେଳ  ପରିସର  ଆଦିରେ  ପିଲାମାନେ  ପଡିନଯିବା  ଭଳି  ସୁରକ୍ଷା  ବ୍ୟବସ୍ଥା  କରିବା  ଦରକାର ।
+୪. ଛୁରୀ , କଇଁଚି , ଧାରୁଆ ବା  ମୁନିଆ  ଜିନିଷ , ଭଙ୍ଗା କାଚ  ଆଦିରୁ  ଗୁରୁତର   ଆଘାତ  ଆସିପାରେ ।
+ଏହି  ସବୁ  ଜିନିଷ  ପିଲାଙ୍କ  ହାଟପା’ନ୍ତାରୁ  ଦୂରରେ  ରଖିବା  ଦରକାର ।
+୫. ଛୋଟ  ପିଲା  ବିଭିନ୍ନ  ଜିନିଷ  ପାଟିରେ  ପୂରାଇବାକୁ  ଭଲପାଏ ଛୋଟ  ଜିନିଷ  ସବୁ ତା’  ପାଖରେ  ଣ  ରଖିବା  ଉଚିତ ।
+ନହେଲେ  ପାଟିରେ   ପୂରାଇଲେ  ଏହା  ତଣ୍ଟିରେ  ଲାଗି  ଯାଇପାରେ ।
+୬. ବିଷ , ଔଷଧ , ଅମ୍ଳ ଓ  କିରାସିନି  ଭଳି  ହାନିକାରୀ ତରଳ  ପାଣି  ବୋତଲରେ  ରଖିବା  ଅନୁଚିତ ।
+ଏସବୁ  ଜିନିଷ  ରହିଥିବା  ପାତ୍ରରେ  ସେସବୁର  ନାଁ  ସ୍ପଷ୍ଟ  କରି  ଲେଖିବା  ଜରୁରୀ ।
+ଏଗୁଡ଼ିକୁ  ବି  ପିଲାମାନେ   ଦେଖିପାରୁ  ନଥିବା  ଏବଂ  ତାଙ୍କ  ହାତ  ପାଉନଥିବା  ଜାଗାରେ  ରଖିବା  ଭଲ ।
+୭. ଦୁଇ  ମିନିଟରୁ  କମ୍   ସମୟରେ  ପିଲାମାନେ  ବୁଡିଯାଇ  ପାରନ୍ତି ।
+ଏଥିପାଇଁ  ବେଶୀ  ପାଣି  ମଧ୍ୟ  ଦରକାର  ହୁଏ  ନାହିଁ ।
+ତେଣୁ  ପାଣିରେ  ବା ପାଣି  ପାଖରେ  ପିଲାମାନଙ୍କୁ   ଏକେଲା  ଛାଡିବା  ଆଦୌ  ଉଚିତ  ନୁହେଁ ।
+୮. ପାଞ୍ଚ  ବର୍ଷରୁ  କମ୍  ବୟସର  ପିଲାଙ୍କ   ପାଇଁ  ରାସ୍ତାରେ  ଚାଲିବା  ବିଶେଷ  ଭାବରେ  ବିପଦର   କଥା  ହୁଏ ।
+ସେମାନଙ୍କ  ସାଙ୍ଗରେ  ସବୁବେଳେ   କେହି  ଜଣେ  ରହିବା  ଦରକାର ।
+ଚାଲି  ଶିଖିବା  ବେଳରୁ  ହିଁ  ସେମାନଙ୍କୁ  ରାସ୍ତାରେ   ଚାଲିବାର  ନିୟମ  ବିଷୟରେ   କହିବା   ଉଚିତ ।
+ଛୋଟ  ପିଲାଙ୍କ  ପ୍ରତି  ଯଥେଷ୍ଟ  ଧ୍ୟାନ
+ବାପାମା’  ଓ  ଯତ୍ନକାରୀମାନେ  ଛୋଟ  ପିଲାଙ୍କ  ପ୍ରତି  ଯଥେଷ୍ଟ  ଧ୍ୟାନ  ଦେଲେ  ଏବଂ  ପିଲାଙ୍କ  ପରିବେଶକୁ   ନିରାପଦ  ରଖିଲେ  ଅନେକ  ଗୁରୁତର  ଆଘାତ  ଏଡାଯାଇ  ପାରିବ ।
+ଦେଢ   ବର୍ଷରୁ  ଚାରି  ବର୍ଷ  ବୟସର  ପିଲାମାନଙ୍କ  କ୍ଷେତ୍ରରେ  ଗୁରୁତର  ଆଘାତ  ପାଇବା  ବା  ଜୀବନ  ହରାଇବାର  ଆଶଙ୍କା  ଅଧିକ ।
+ଏଭଳି  ଅଧିକାଂଶ  ଆଘାତ  ସେମାନେ   ଘରେ   ହିଁ  ପାଇଥା’ନ୍ତି ।
+ପ୍ରାୟ  ସବୁ  ଆଘାତ  ରୋକାଯାଇ  ପାରିବ ।
+ଘରେ  ଆସୁଥିବା  ଆଘାତ  ସବୁର  ମୁଖ୍ୟ  କାରଣ
+ନିଆଁ , ଚୂଲି , ରନ୍ଧନ  ପାତ୍ର , ଗରମ  ଖାଦ୍ୟ , ଫୁଟନ୍ତା  ପାଣି , ବାମ୍ଫ , ଗରମ ତେଲ , କିରାସିନି  ବତୀ , ଇସ୍ତ୍ରୀ  ଏବଂ ବିଦ୍ୟୁତ  ସରଞ୍ଜାମ   ଛୁଇଁବା  ଯୋଗୁଁ  ପୋଡି  ହେବା ।
+ଭଙ୍ଗା  କାଚ, ଛୁରୀ , କଇଁଚି , କୁରାଢି  ଆଦିରେ  କାଟି  ହୋଇଯିବା
+ଖଟ , ଝରକା , ଟେବୁଲ , ବା  ଶିଡିରୁ  ଖସି  ପଡିବା
+ମୁଦ୍ରା , ବୋତାମ ବା  ମଞ୍ଜି ଭଳି  ଛୋଟ  ଜିନିଷ  ତଣ୍ଟିରେ  ଲାଗିବା
+କିରାସିନି , କୀଟନାଶକ  ବା  ପରିଷ୍କାରକ  ଆଦି  ଖାଇବାର  ବିଷାକ୍ତ   ପ୍ରଭାବ
+ଭଙ୍ଗା  ବିଦ୍ୟୁତ  ଉପକରଣ  ବା  ତାର  ଛୁଇଁବାରୁ  କିମ୍ବା  ପ୍ଲଗ  ଦେହରେ  କାଠି  ବା  କଣ୍ଟା  ଆଦି  କେଞ୍ଚିବାରୁ  ସକ୍  ଲାଗିବା
+ଚଳଚଞ୍ଚଳ  ଛୋଟ  ପିଲାଙ୍କ  ପାଇଁ  ବିପଦ  ଆଣୁଥିବା ଜିନିଷ  ସବୁକୁ  ତାଙ୍କଠାରୁ  ଦୂରରେ  ଓ  ଅପହଞ୍ଚ  ଜାଗାରେ  ରଖିବା  ଉଚିତ ।
+ପିଲାଙ୍କୁ  ଲମ୍ବା ସମୟ  ପାଇଁ  ଖଟାଇବା ଏବଂ  ବିପଦ  ଥିବା  ବା  ପାଠପଢାରେ  ବାଧା  ଦେଉଥିବା  କାମରେ  ଲଗାଇବା  ପୂରା  ଅନୁଚିତ ।
+କଷ୍ଟ  କାମ , ବିପଦଜନକ  ହତିଆର  ଏବଂ ବିଷାକ୍ତ  ରାସାୟନିକ  ଆଦିରୁ  ପିଲାଙ୍କୁ  ସୁରକ୍ଷା  ଦେବା  ଜରୁରୀ ।
+ନିଆଁ , ଚୂଲି , ବତୀ , ଦିଆସିଲି ଏବଂ  ବିଦ୍ୟୁତ  ସରଞ୍ଜାମ  ଆଦୀରୁ  ପିଲାଙ୍କୁ  ଦୂରେଇ  ରଖିବା  ଉଚିତ ।
+ଛୋଟ  ପିଲାଙ୍କର  ଗୁରୁତର  ଆଘାତର  ସବୁଠାରୁ  ସାଧାରଣ  କାରଣ  ହେଉଛି ନିଆଁ , ଗରମ  ଜିନିଷ ବା  ବାମ୍ଫରେ  ପୋଡିଯିବା ।
+ପିଲାମାନେ   ଜଳନ୍ତା  ଚୂଲି , ଗରମ  ଖାଦ୍ୟ , ଫୁଟନ୍ତା  ପାଣି , ଗରମ  ଇସ୍ତ୍ରୀ  ଆଦିକୁ  ଛୁଇଁ   ନପାରିବା  ବ୍ୟବସ୍ଥା  କରିବା  ଦରକାର ।
+ପୋଡିହେବାର   କ୍ଷତ  ଅନେକ  ସମୟରେ  ଗୁରୁତର  ହୋଇଥାଏ  ଏବଂ  ଦେହରେ  ସବୁଦିନ  ପାଇଁ  ଦାଗ  ଛାଡିଦିଏ ।
+କେତେକ  କ୍ଷେତ୍ରରେ  ଏହା  ମୃତ୍ୟୁର  କାରଣ  ମଧ୍ୟ  ହୁଏ ।
+ଅଧିକାଂଶ  ସମୟରେ  ଏହିଭଳି  ଆଘାତଗୁଡିକୁ  ଏଡାଇ  ଦିଆଯାଇ  ପାରିବ ।
+ପୋଡିହେବାରୁ  ବଞ୍ଚାଇବାର  କିଛି  ବାଟ :
+ଛୋଟ  ପିଲାଙ୍କୁ  ନିଆଁ , ଦିଆସିଲି  ଓ  ଜଳନ୍ତା ସିଗାରେଟ  ଆଦିଠାରୁ  ଦୂରେଇ  ରଖିବା ।
+ଚୂଳିକୁ   ପିଲାଙ୍କ  ହାତ  ନପାଇଲା  ଭଳି  ଉଚ୍ଚା  ଜାଗାରେ   ରଖିବା ।
+ଖୋଲା  ଚୂଲି  ସିଧା  ମାଟି  ଉପରେ  ଉଚ୍ଚ  ମାଟି  କୁଦ  ଉପରେ  କରିବା ।
+ରନ୍ଧା  ବାସନର   ହାଣ୍ଡଲ  ସବୁ  ପିଲାଙ୍କ  ହାତ  ନପାଇଲା  ଭଳି  ବୁଲାଇ   ରଖିବା ।
+ପେଟ୍ରୋଲ , କିରାସିନି , ବତୀ , ଦିଆସିଲି , ମହମବତୀ, ଗରମ  ଇସ୍ତ୍ରୀ , ବିଦ୍ୟୁତ  ତାର  ଆଦିକୁ   ପିଲାଙ୍କ  ଅପହଞ୍ଚ  ଜାଗାରେ  ରଖିବା ।
+ବିଦ୍ୟୁତ  ପ୍ଲଗ  ଭିତରେ  ଆଙ୍ଗୁଠି  ବା  ଅନ୍ୟ  ଜିନିଷ  ପୂରାଇବା  ଫଳରେ  ପିଲାମାନେ  ଶକ୍ତ  ଆଘାତ  ପାଇ  ପାରନ୍ତି ।
+କାମରେ  ଲାଗୁନଥିବା  ପ୍ଲଗ ଗୁଡିକରେ  ଖୋଳ  ଲଗାଇ  ବନ୍ଦକରି  ରଖିବା  ଉଚିତ ।
+ପିଲାଙ୍କ   ହାତପା’ନ୍ତାରେ  ବିଦ୍ୟୁତ  ତାର  ରଖିବା  ଉଚିତ  ନୁହେଁ ।
+ଖୋଲା  ତାର  ବିଶେଷ  ଭାବରେ  ବିପଦର  କାରଣ  ହୁଏ ।
+ପିଲାମାନେ  ପଡିନଯିବା  ଭଳି  ସୁରକ୍ଷା  ବ୍ୟବସ୍ଥା  କରିବା  ଦରକାର
+ପିଲାମାନେ  ଚଢିବାକୁ  ଭଲପା’ନ୍ତି ।
+ତେଣୁ  ଶିଡି , ଛାତ , ଝରକା  ଏବଂ  ଖେଳ  ପରିସର  ଆଦିରେ  ପିଲାମାନେ  ପଡିନଯିବା  ଭଳି  ସୁରକ୍ଷା  ବ୍ୟବସ୍ଥା  କରିବା  ଦରକାର ।
+ଛେଚିହେବା , ହାଡ  ଭାଙ୍ଗିବା ବା  ମୁଣ୍ଡରେ  ଗୁରୁତର  ଆଘାତ  ଲାଗିବାର  ସାଧାରଣ  କାରଣ  ହେଉଛି  ପଡିଯିବା ।
+ ବିପଦଜନକ  ଭାବରେ  ପଡିବାରୁ   ରକ୍ଷା  କରିବାର  କିଛି  ବାଟ  ହେଉଛି :
+ବିପଦଜନକ  ଜାଗାରେ  ଚଢିବାରୁ  ପିଲାଙ୍କୁ  ନିରୁତ୍ସାହିତ  କରିବା ।
+ଶିଡି , ଝରକା  ଓ  ଛାତ  ଆଦିରେ  ବାଡ  ଲଗାଇବା ।
+ଘରକୁ  ପରିଷ୍କାର  ଓ  ଆଲୋକିତ  ରଖିବା ।
+ଛୁରୀ , କଇଁଚି , ଧାରୁଆ ବା  ମୁନିଆ  ଜିନିଷ , ଭଙ୍ଗା କାଚ  ଆଦିରୁ  ଗୁରୁତର   ଆଘାତ  ଆସିପାରେ ।
+ଏହି  ସବୁ  ଜିନିଷ  ପିଲାଙ୍କ  ହାଟପା’ନ୍ତାରୁ  ଦୂରରେ  ରଖିବା  ଦରକାର ।
+ଭଙ୍ଗା କାଚ  ଗଭୀର  କଟା  କ୍ଷତ କରିପାରେ  ଏବଂ  ରକ୍ତ ହାନି  ଓ  ସଂକ୍ରମିତ  ଘା  ସୃଷ୍ଟି  କରିପାରେ ।
+କାଚ  ଜିନିଷ  ପିଲାଙ୍କ  ହାତ  ନପାଉଥିବା  ଜାଗାରେ  ରଖିବା  ଉଚିତ ।
+ଘର ଓ  ଆଖପାଖରେ  ଖେଳିବା  ଜାଗାରେ  ଯେପରି  ଭଙ୍ଗା କାଚ  ନରହେ  ସେଥିପ୍ରତି  ଦୃଷ୍ଟିଦେବା  ଦରକାର ।
+ଏସବୁକୁ  ନଛୁଇଁବା  ପାଇଁ  ଛୋଟ  ପିଲାଙ୍କୁ  ସାବଧାନ  କରିଦେବା  ଉଚିତ ।
+ଏଗୁଡ଼ିକୁ  ନେଇ  ନିରାପଦ  ଜାଗାରେ  ରଖିବା  କଥା  ବଡ  ପିଲାଙ୍କୁ   ଶିଖାଇବା  ଦରକାର ।
+ଛୁରୀ , କଇଁଚି   ଆଦି  ଛୋଟ  ପିଲାଙ୍କ  ହାଟପା’ନ୍ତାରେ  ରଖିବା  ଉଚିତ  ନୁହେଁ ।
+ଏସବୁକୁ  ନିରାପଦ  ଭାବରେ  ବ୍ୟବହାର  କରିବାର   ବାଟ  ବଡ  ପିଲାଙ୍କୁ    ଶିଖାଇବା  ଦରକାର ।
+ମୁନିଆ  ଧାତବ  ଜିନିଷ , ଯନ୍ତ୍ରପାତି  ଓ  କଳଙ୍କି  ଲଗା  ଟିଣ  ଡବା  ଆଦିରୁ   କଟା କ୍ଷତ  ଓ  ଗୁରୁତର   ଭାବରେ  ସଂକ୍ରମିତ  ଘା  ଆସିବାର  ଡର  ଥାଏ ।
+ପିଲାଙ୍କ  ଖେଳିବା  ଜାଗାରୁ  ଏସବୁ  ସଫା  କରିଦେବା  ଉଚିତ ।
+ଘରୁ  ବାହାରୁଥିବା  ଅଦରକାରୀ  ଓ  ଭଙ୍ଗା  କାଚ ଓ  ଟିଣ  ଡବା  ଆଦିକୁ  ବିପଦ  ନଆଣିବା  ଭଳି  ଖଲାସ  କରିବା  ଦରକାର ।
+ଟେକା ବା  ଅନ୍ୟ  ଧାରୁଆ  ଜିନିଷ  ଫୋପାଡିବା  ଏବଂ  ଛୁରୀ  କଇଁଚି  ଆଦିରେ  ଖେଳିବାର  ବିପଦ  ବିଷୟରେ  ପିଲାଙ୍କୁ  ସଚେତନ  କରିଦେଲେ  ଘରେ  ଆସୁଥିବା  ଅନେକ  ଆଘାତ  ଏଡାଇ  ହୋଇପାରିବ ।
+ଛୋଟ  ଜିନିଷ  ସବୁ ପିଲା ପାଖରେ  ନ  ରଖିବା  ଉଚିତ
+ଛୋଟ  ପିଲା  ବିଭିନ୍ନ  ଜିନିଷ  ପାଟିରେ  ପୂରାଇବାକୁ  ଭଲପାଏ ଛୋଟ  ଜିନିଷ  ସବୁ ତା’  ପାଖରେ  ନ  ରଖିବା  ଉଚିତ ।
+ନହେଲେ  ପାଟିରେ   ପୂରାଇଲେ  ଏହା  ତଣ୍ଟିରେ  ଲାଗି  ଯାଇପାରେ ।
+ପିଲାଙ୍କ  ଖେଳିବା  ଓ  ଶୋଇବା  ଅଞ୍ଚଳରୁ   ବୋତାମ , ମାଳି , ମୁଦ୍ରା , ମଞ୍ଜି  ଭଳି  ଛୋଟ  ଜିନିଷ  ସବୁ  ବାହାର କରିଦେବା  ଉଚିତ ।
+ଅତି  ଛୋଟ  ପିଲାଙ୍କୁ   ଚୋପା  ଥିବା  ଚିନାବାଦାମ , ଟାଣ ମିଠେଇ କିମ୍ବା  ଛୋଟ  ହାଡ ବା  ମଞ୍ଜି  ଥିବା  ଖାଦ୍ୟ  ଦେବା  ଉଚିତ  ନୁହେଁ ।
+ଖାଇବା  ସମୟରେ  ଛୋଟ  ପିଲାଙ୍କ  ଉପରେ  ଧ୍ୟାନ  ରଖିବା  ଜରୁରୀ ।
+ଖାଦ୍ୟକୁ  ଛୋଟ ଛୋଟ  ଖଣ୍ଡରେ  ଭାଙ୍ଗି  ଛୋଟ  ପିଲାଙ୍କୁ  ଦେବା  ଉଚିତ ।
+କାଶିବା , ଗଂ ଗଂ  ଶବ୍ଦ  କରିବା , ନିଶ୍ଵାସ  ନେଲାବେଳେ  ଜୋର  ବା  ହୁଇସିଲ  ଭଳି  ଶବ୍ଦ  ବାହାରିବା  କିମ୍ବା  ପାଟିରୁ  କିଛି  ସ୍ଵର  ନବାହାରିବା  ହେଉଛି  ନିଶ୍ଵାସ  ନେବାରେ  ଅସୁବିଧା  ବା  ତଣ୍ଟିରେ  କିଛି  ଲାଖିଥିବାର   ସୂଚନା ।
+ତଣ୍ଟିରେ  ଲାଖିବା  ଏକ  ଜରୁରୀକାଳୀନ  ପରିସ୍ଥିତି ।
+ଛୋଟ  ପିଲାଟିଏ  ହଠାତ  ଯଦି  ନିଶ୍ଵାସ  ନେବାରେ  କଷ୍ଟ  ହେଉଥିବାର  ସୂଚନା  ଦେଖାଏ , ତେବେ  ତଣ୍ଟିରେ  କିଛି  ଲାଗିଥିବା  କଥା  ସନ୍ଦେହ  କରିବାକୁ  ହେବ ।
+ସେ  ପାଟିରେ  କିଛି  ପୂରାଇବା  କଥା  କେହି  ଦେଖି  ନଥିଲେ  ବି  ତାହା  ଘଟିଥିବା  କଥା  ସନ୍ଦେହ  କରିବାକୁ  ହେବ ।
+ବିଷ , ଔଷଧ , ଅମ୍ଳ ଓ  କିରାସିନି  ଭଳି  ହାନିକାରୀ ତରଳ  ପାଣି  ବୋତଲରେ  ରଖିବା  ଅନୁଚିତ ।
+ଏସବୁ  ଜିନିଷ  ରହିଥିବା  ପାତ୍ରରେ  ସେସବୁର  ନାଁ  ସ୍ପଷ୍ଟ  କରି  ଲେଖିବା  ଜରୁରୀ ।
+ଏଗୁଡ଼ିକୁ  ବି  ପିଲାମାନେ   ଦେଖିପାରୁ  ନଥିବା  ଏବଂ  ତାଙ୍କ  ହାତ  ପାଉନଥିବା  ଜାଗାରେ  ରଖିବା  ଭଲ ।
+ବିସର  ପ୍ରଭାବ  ଛୋଟ  ପିଲାଙ୍କ  ପାଇଁ  ଅତି  ଗୁରୁତର  ହୁଏ ।
+ପରିଷ୍କାରକ , ମୂଷାବିଷ , କୀଟନାଶକ  ଓ  କିରାସିନି  ଆଦି  ପିଲାଙ୍କର  ମୃତ୍ୟୁର  ବା  ଚିରସ୍ଥାୟୀ  ଆଘାତର  କାରଣ  ହୋଇପାରେ ।
+କେବଳ  ଯେ  ବିଷ  କ୍ଷତି  କରେ  ତାହା  ନୁହେଁ ।
+ଅନ୍ୟ  ବାଟରେ  ମଧ୍ୟ  ବିଷ  ଯୋଗୁ  ମୃତ୍ୟୁ , ମସ୍ତିସ୍କ  କ୍ଷତ , ଦୃଷ୍ଟିହୀନତା  ବା  ଅନ୍ୟ  ସ୍ଥାୟୀ  ଆଘାତ  ଆସିପାରେ ।
+ ଏହା  ଘଟିପାରେ  ଯଦି  କିଛି  ବିଷ  -
+ନିଶ୍ଵାସରେ  ଦେହ  ଭିତରକୁ  ଯାଏ
+ପିଲାର  ଆଖିରେ  ପଶେ  ବା  ଚମରେ  ବୋଳିହୁଏ
+ପିଲାର  ଲୁଗାପଟାରେ  ଲାଗେ
+ସାଧାରଣ  ଭାବରେ  ଯେଉଁ  ବୋତଲ ବା  ପାତ୍ରରେ  ପିଇବା  ଜିନିଷ  ରହେ  ସେଥିରେ  ବିଷାକ୍ତ  ଜିନିଷ  ରଖିବା  କଥା  ନୁହେଁ ।
+କାରଣ   ପିଲାମାନେ   ତାହା  ଭୁଲରେ  ପିଇଦେଇ   ପାରନ୍ତି ।
+ସବୁ  ପ୍ରକାରର  ଔଷଧ , ରାସାୟନିକ  ଓ  ବିଷ  ସେସବୁର  ମୂଳ  ବୋତଲରେ  ଭଲ  ଭାବରେ  ବନ୍ଦକରି   ରଖିବା  ଉଚିତ ।
+ପିଲା  ପହଞ୍ଚି  ପାରୁଥିବା  ଜାଗାରେ  ପରିଷ୍କାରକ , ବିରଞ୍ଜକ ,ରାସାୟନିକ  ଓ  ଔଷଧ  ଆଦି  ରଖିବା  ଉଚିତ  ନୁହେଁ ।
+ସେସବୁ  ଭଲ  ଭାବରେ   ବନ୍ଦ  କରାଯିବା  ଓ  ବୋତଲ  ଉପରେ  ସେସବୁର ନାଁ ଲେଖାଯିବା  ଦରକାର ।
+ଏଗୁଡିକୁ  ଟ୍ରଙ୍କ ବା  ଆଲମାରୀରେ  ତାଲା  ପକାଇ  ପିଲା  ଦେଖିପାରୁନଥିବା  ଓ  ପହଞ୍ଚିପାରୁନଥିବା  ଜାଗାରେ  ରଖିବା  ଆହୁରି   ଭଲ ।
+ବଡଙ୍କ  ଔଷଧ  ପିଲାଙ୍କୁ  ମାରିଦେଇ  ପାରେ ।
+ପିଲା  ପାଇଁ  ସ୍ଵତନ୍ତ୍ର  ଭାବରେ  ଲେଖା  ଯାଇଥିବା  ଔଷଧ  ହିଁ  ତାକୁ  ଦେବା  ଉଚିତ ।
+ବଡଙ୍କ  ପାଇଁ  ବା  ଅନ୍ୟ  ପିଲା  ପାଇଁ  ଦିଆଯାଇଥିବା  ଔଷଧ  ଖୁଆଇବା  ଉଚିତ  ନୁହେଁ ।
+ଆଣ୍ଟିବାୟୋଟିକ୍ ର  ଅତ୍ୟଧିକ  ବ୍ୟବହାର  ବା  ଅପବ୍ୟବହାର  ଛୋଟ  ପିଲାକୁ  କାଲ  କରିଦେଇ  ପାରେ  ସ୍ୱାସ୍ଥ୍ୟକର୍ମୀ  ଦେଇଥିବା  ଔଷଧ  କେବଳ  ପିଲାକୁ  ଖୁଆଇବା  ଉଚିତ ।
+ଦୁଇ  ମିନିଟରୁ  କମ୍ ସମୟରେ  ପିଲାମାନେ  ବୁଡିଯାଇ  ପାରନ୍ତି ।
+ଏଥିପାଇଁ  ବେଶୀ  ପାଣି  ମଧ୍ୟ  ଦରକାର  ହୁଏ  ନାହିଁ ।
+ତେଣୁ  ପାଣିରେ  ବା ପାଣି  ପାଖରେ  ପିଲାମାନଙ୍କୁ   ଏକେଲା  ଛାଡିବା  ଆଦୌ  ଉଚିତ  ନୁହେଁ ।
+କୂଅ , ପାଣିଭରା କୁଣ୍ଡ  ବା  ବାଲ୍ ଟି  ଆଡିକୁ  ଘୋଡାଇ  ରଖିବା  ଉଚିତ ।
+ସାନ  ବେଲାରୁ  ପିଲାଙ୍କୁ  ପହଁରା  ଶିଖାଇବା  ଭଲ ।
+ତାହେଲେ  ସେମାନେ  ବୁଡିଯିବାର ଡର ରହିବ  ନାହିଁ ।
+ଖର  ସୁଅରେ  ବା  ଏକେଲା  ପହଁରିବାରୁ  ପିଲାଙ୍କୁ   ଅଟକାଇବା   ଉଚିତ ।
+ରାସ୍ତା  ପାରିହେବା  ବେଳେ  କିଛି କଥା  ପିଲାଙ୍କୁ  ଶିଖାଇବା  ଉଚିତ
+ପାଞ୍ଚ  ବର୍ଷରୁ  କମ୍  ବୟସର  ପିଲାଙ୍କ   ପାଇଁ  ରାସ୍ତାରେ  ଚାଲିବା  ବିଶେଷ  ଭାବରେ  ବିପଦର   କଥା  ହୁଏ ।
+ସେମାନଙ୍କ  ସାଙ୍ଗରେ  ସବୁବେଳେ   କେହି  ଜଣେ  ରହିବା  ଦରକାର ।
+ଚାଲି  ଶିଖିବା  ବେଳରୁ  ହିଁ  ସେମାନଙ୍କୁ  ରାସ୍ତାରେ   ଚାଲିବାର  ନିୟମ  ବିଷୟରେ   କହିବା   ଉଚିତ ।
+ରାସ୍ତାକୁ  ଦୌଡିଯିବା   ଆଗରୁ  ଛୋଟ  ପିଲାମାନେ   କିଛି  ଭାବନ୍ତି  ନାହିଁ ।
+ତେଣୁ  ବଡମାନେ  ପିଲାଙ୍କ  ପ୍ରତି  ଧ୍ୟାନଦେବା   ଦରକାର ।
+ପିଲାମାନେ  ରାସ୍ତା  ପାଖରେ  ଖେଳିବା  ଉଚିତ  ନୁହେଁ ।
+ସେଠାରେ  ବଲ୍ ଖେଳିବା  ବିଶେଷ  ବିପଦର  କଥା ।
+ଚଳନ୍ତା  ଗାଡିମଟରକୁ  ସାମନା   କରି  ରାସ୍ତାର  କଡରେ  ଚାଲିବା  ପାଇଁ  ପିଲାଙ୍କୁ   ଶିଖାଇବା  ଦରକାର ।
+ରାସ୍ତା  ପାରିହେବା  ବେଳେ   ତଳର  କଥାଗୁଡ଼ିକ  କରିବା  ପାଇଁ  ପିଲାଙ୍କୁ  ଶିଖାଇବା  ଉଚିତ  :
+ରାସ୍ତାର  ଧାରରେ  ଅଟକିବା
+ଦୁଇ  କଡକୁ  ଚାହିଁବା ,
+ଗାଡିମଟର  ଆସୁଥିବାର  ଶବ୍ଦ  ପ୍ରତି  କାନ  ଡେରିବା ,
+ବଡମାନଙ୍କର  ହାତ  ଧରିବା ,
+ଚାଲିକରି  ପାରିହେବା , ଦୌଡିବା  ନାହିଁ ।
+ନିଜେ  ରାସ୍ତାଚଲାର  ନିୟମ  ମାନି  ସାନ  ପିଲାଙ୍କୁ  ସାହାଯ୍ୟ   କରିବା  ଦିଗରେ  ବଡ  ପିଲାଙ୍କୁ  ଉତ୍ସାହିତ  କରିବା  ଉଚିତ ।
+ବଡ  ପିଲାଙ୍କ  ପାଇଁ  ସାଇକେଲ  ଦୁର୍ଘଟଣା  ଅନେକ  ସମୟରେ  ଆଘାତ  ବା  ମୃତ୍ୟୁର  କାରଣ  ହୁଏ ।
+ସାଇକେଲ  ଚଲାଉଥିବା  ପିଲାଙ୍କୁ  ରାସ୍ତାରେ   ନିରାପଦ  ଭାବରେ  ଗାଡି  ଚଳାଇବାର  ନିୟମ  ଶିଖାଇଲେ  ଏଭଳି  ଦୁର୍ଘଟଣା  ଏଡାଯାଇ  ପାରିବ ।
+ଅଧିକ  ବିପଦ  ଥିବା  ଜାଗାରେ  ସାଇକେଲ  ଚଳାଇଲା  ବେଳେ  ମୁଣ୍ଡରେ  ସୁରକ୍ଷା  ଟୋପି  ପିନ୍ଧିବା  ଭଲ ।
+କାରରେ  ଆଗ  ସିଟ୍ ରେ  ବା  ଟ୍ରକର  ଡାଲାରେ  ଏକେଲା  ବସିଥିବା  ପିଲା  ପ୍ରତି  ଗୁରୁତର  ଆଘାତର  ବିପଦ ବେଶୀ ହୁଏ ।