diff --git a/Data Collected/Odia/IIIT-BH/Monolingual-corpora/odiasahitya.com/sent_odiasahitya_pustak_1 b/Data Collected/Odia/IIIT-BH/Monolingual-corpora/odiasahitya.com/sent_odiasahitya_pustak_1
new file mode 100644
index 0000000000000000000000000000000000000000..269d34e0af4758430f2554940d07c884ed5ae0ec
--- /dev/null
+++ b/Data Collected/Odia/IIIT-BH/Monolingual-corpora/odiasahitya.com/sent_odiasahitya_pustak_1	
@@ -0,0 +1,79 @@
+କାଳିଝିଅ ସବୁଜାଣେ - ପୁସ୍ତକ ସମୀକ୍ଷା
+- ଓଡ଼ିଆସାହିତ୍ୟ ପ୍ରେସ୍‌
+ତା: ଜାନୁଆରୀ ୨୮, ୨୦୧୨  
+ମୂଳ ପୃଷ୍ଠା → ପୁସ୍ତକ ସମୀକ୍ଷା →
+ଲେଖକ : ଡ.ତୀର୍ଥାନନ୍ଦ ମିଶ୍ର
+ପ୍ରକାଶକ : ଅନ୍ବେଷା ପ୍ରକାଶନୀ
+ସମୀକ୍ଷକ : ଉମାକାନ୍ତ ମିଶ୍ର (ସଂଯୋଜକ)
+କବି ଓ ସମାଲୋଚକ ଓଡ଼ିଆ ପ୍ରାଧ୍ୟାପକ ଡ.ତୀର୍ଥାନନ୍ଦ ମିଶ୍ର ଓଡ଼ିଆ ଆଧୁନିକ କବିତାରେ ଏକ ସୁପରିଚିତ ନାମ ।
+କେବଳ କବି ଭାବରେ ନୁହେଁ ସମାଲୋଚନା ସାହିତ୍ୟ ଓ ଆଧ୍ୟାତ୍ମିକ ପ୍ରବଚନ ପ୍ରଦାନରେ ମଧ୍ୟ ତାଙ୍କର ସୁଖ୍ୟାତି ରହିଛି ।
+ପକ୍ଷୀଟିଏ ହେଲେ, ଶ୍ୟାମଳ ସାରାଂଶ ଓ କାଳିଝିଅ ସବୁଜାଣେ ଆଦି ସୃଷ୍ଟି କରି ଆଧୁନିକ ଓଡ଼ିଆ କବିତାରେ ସେ ନିଜର ସ୍ଥିତିକୁ ସୁଦୃଢ଼ କରିଛନ୍ତି ।
+ସେହିପରି ପ୍ରାଚୀନ ସାହିତ୍ୟର ଆଲୋଚନାରେ ଡ.ମିଶ୍ର ଶତତଃ ଚେଷ୍ଟିତ ।
+ତାଙ୍କର ‘କାଳିଝିଅ ସବୁଜାଣେ’ର ଇଲାକା ଏକ ଭିନ୍ନ ଇଲାକା ।
+କାଳିଝିଅ ସବୁଜାଣେ କବିତା ସଙ୍କଳନରେ ମୋଟ ସତଚାଳିଶଟି କବିତା ସନ୍ନିବେଶିତ ହୋଇଛି ।
+ କବି ତାଙ୍କର ଏକ ଆଧ୍ୟାତ୍ମିକ କବିତା ନୀଳଚକ୍ରରେ ଲେଖିଛନ୍ତି :
+ପବନ ଆଉ ପତାକା ଏକତ୍ର
+ନୀଳଚକ୍ର
+ଆଗରେ ଖୋଦିତ ହୁଏ ବିଶ୍ବ
+ପବନରେ ଖେଳେ ଅଣଚାଶ
+ପତାକାରେ ନିଃଶ୍ବାସ
+ଚକ୍ରରେ ବିଶ୍ବାସ
+ଜୀବନରେ ବିତିଯାଏ
+ଦିନ ମାସ ବର୍ଷ ।
+ଗିରିବାଳା ମହାନ୍ତିଙ୍କ କାଳିଝିଅ ପରି ତୀର୍ଥାନନ୍ଦ ମିଶ୍ରଙ୍କର କାଳିଝିଅ ନିର୍ବୋଧ ନୁହେଁ ।
+ସବୁଜାଣେ, ମିଶାଶ ଫେଡାଣ, ତାରଣ ମାରଣ ସବୁକିଛି କବିଙ୍କ ଭାଷାରେ ସରଳ ଭାବେ ବର୍ଣ୍ଣିତ ।
+ସେହିପରି କାଳିଝିଅର ବହୁ ଆଶା ଆକାଂକ୍ଷା ସବୁରି ପାଖରେ ଅଳି ଅଝଟ ରହିଛି ।
+ ଏ ବାବଦରେ କବିଙ୍କ ଭାଷାରେ –
+‘ଅନେକରେ ମା ପାଖରେ ରଙ୍ଗ ରୂପ
+ବାପା ପାଖେ ଐଶ୍ବର୍ଯ୍ୟମଖା ଆୟୁଷ
+ଫୁଲ ପାଖେ ଗହଳ ଗଭା
+ନଈ ପାଖେ କଳା ଭଅଁର ଖେଳ ।’
+ମାଗିବାରେ ତୃଷ୍ଣା ମେଣ୍ଟିନି କାଳିଝିଅର ଓ ତାର ମଧ୍ୟ ଦାନ ପାଇଁ ଇଛା ଥାଏ ।
+ପୃଥିବୀକୁ ଅକୁଣ୍ଠ ଚିତ୍ତରେ ସମର୍ପଣରେ ଆତ୍ମତୃପ୍ତି ଥାଏ ତାର ।
+ କବିଙ୍କ ଭାଷାରେ କାଳିଝିଅ :
+ଝରଣାକୁ କ୍ଷିପ୍ରଗତି
+ଗୁମ୍‌ସୁମ୍‌ ଆକାଶକୁ
+ଦରଦୀ ଦୀର୍ଘଶ୍ବାସ
+ସମର୍ପଣରେ କେହି
+ନିଃସ୍ବ ହୁଏନି ବୋଲି
+ଜାଣିଚି ତାହେଲେ କାଳିଝିଅ
+‘ହଜିଲା ଦିନ’ର କବିତାରେ କବି ତୀର୍ଥାନନ୍ଦ ମିଶ୍ର ନିଜର ଆତ୍ମଲିପି ଭଳି ବ୍ୟକ୍ତିଗତ ଜୀବନର ସତ୍ୟ ପ୍ରକାଶ କରିବାରେ ନିପୁଣତା ପ୍ରକାଶ କରିଛନ୍ତି ।
+“ହଜିଲା ଦିନ” କବିତାରେ କବିଙ୍କର ବାସ୍ତବବାଦୀ ଦୃଷ୍ଟିଭଙ୍ଗୀ ଏବଂ ରୋମାଣ୍ଟିକ ଚେତନା ବେଶ ସାବଲୀଳ ଭାବେ ବର୍ଣ୍ଣିତ ।
+ ଉଦାହରଣସ୍ବରୂପ କବିଙ୍କ ଭାଷାରେ :-
+ମୁଁ ଆଉ ଗୌତମୀ
+ସହଧ୍ୟାୟୀ ଥିଲୁ ଭଞ୍ଜବିହାରରେ
+କାନ୍ଥବାଡ଼ରେ ଆମ ଦିହିଁଙ୍କ ନାଁ
+ପ୍ରତିଟି ଗଛମୂଳେ
+ଉଭା ରାତିରେ ବିତିଥିଲା ହଜିଲା ଦିନ
+ସେଇ ବିଶ୍ବବିଦ୍ୟାଳୟରେ ଏବେ ରାହୁଳ
+ପଦାର୍ଥ ବିଜ୍ଞାନରେ ପଞ୍ଚମ ବର୍ଷରେ
+କହିଥିଲି ଗୌତମୀକି
+ପୁଅକୁ ପଠାଇବନି ଭଞ୍ଜବିହାର
+ତା କାନ୍ଥରେ ବାଡ଼ରେ ତ ନିଭି ନଥିବ ଆମ ନାଁ ଦାଗ
+ମାନିଲା ନାହିଁ, ପୁଅ ସେଇଠି ପଢ଼ିଲା ।
+ସେହିପରି ଦେଖା ସରିନାହିଁ, ସାରା ରାତି ଉଭାରାତି, ଆଖି ଅଭିନୟ, ପାଶାଖେଳ, ନାହିଁ ନଥିବା ଅନୁରାଗ, ଯାତ୍ରା, ଶ୍ୟାମଳ କୁହୁକ, ଆସନ୍ତାକାଲିର ଇତିହାସ ଆଦି କବିତା ସମାଜର ବ୍ୟସ୍ତବହୁଳ ଜୀବନର ନିରୋଳା ପ୍ରତିଛବି ।
+ସେହିପରି ବ୍ୟଙ୍ଗାତ୍ମକ ଦୃଷ୍ଟିକୋଣ ସହ ଅବକ୍ଷୟମୁଖୀ ସମାଜ ପାଇଁ କବିମନ ଶତତଃ ପ୍ରଚେଷ୍ଟାଶୀଳ ।
+ କବିଙ୍କ ଭାଷାରେ “ଗରାଖ” କବିତାରେ:
+ସବୁ ହେବ ଯେ,
+ହେଲେ ଦିନ ଶେଷକୁ
+ଲେଖିବି କ’ଣ ଖାତାରେ
+ବାଟ ଚାହିଁଥିବା ସାହୁକାରକୁ
+କହିବି କ’ଣ ?
+ଟୋପାଏ କିରାସିନି ଆଉ
+ମୁଠାଏ ଚାଉଳର ଅପେକ୍ଷାରେ ଥିବା
+ଉପାସିଆ ପରିବାର ହାତରେ
+ଧରେଇବି କ’ଣ କୁହତ ?
+କବି ତୀର୍ଥାନନ୍ଦ ଦୋକାନୀ କବିତାରେ ଲାଭ ଲୋଭର ଏକ ବ୍ୟାଙ୍ଗାତ୍ମକ ଚିତ୍ର ଉପସ୍ଥାପନ କରିଛନ୍ତି ।
+ ତାଙ୍କ ଭାଷାରେ:-
+ହେଲେ ପରତେ ଯାଅ ହୋ ଗରାଖ ଈଶ୍ବର
+ଲାଭ, ଲୋଭରେ ଅଛିକି ନାହିଁ କହି
+ଦିଗୁଣ ଦରରେ ବିକିନି କେବେ
+ସେମିତି ହୋଇଥିଲେ
+ରାତାରାତି
+ଭରି ସାରନ୍ତିଣି ଅମାର
+କହିସାରନ୍ତିଣି ପିଲାଙ୍କୁ
+ସାଇତି ରଖିଗଲି ମୌରସି
+ବିକିଭାଙ୍ଗି ଖାଉଥା ଅକାଳକାଳ ।
+ତୀର୍ଥାନନ୍ଦ ମିଶ୍ରଙ୍କ କାଳିଝିଅ ସବୁଜାଣେ କବିତାର ସଙ୍କଳନ ଓଡ଼ିଆ ଆଧୁନିକ କବିତାରେ ସହୃଦୟ ପାଠକ ପାଇଁ ଏକ ମାଇଲ ଖୁଣ୍ଟ ।
+ଏଥିରେ ପାଠକ ଜୀବନର ବିଭିନ୍ନ ଦିଗ ବାବଦରେ ସୁକ୍ଷ୍ମ ଦୃଷ୍ଟିଭଙ୍ଗୀ ପାଇଥାଏ ।
+ତେଣୁ ଡ.ତୀର୍ଥାନନ୍ଦଙ୍କର ଏହି ସୃଷ୍ଟି ଓଡ଼ିଆ ପାଠକ ଦରବାରରେ ଆଦୃତ ହେବା ସଙ୍ଗେ ସଙ୍ଗେ କାଳଜୟୀ ହେଉ ବୋଲି ଓଡ଼ିଆ ସାହିତ୍ୟ ଡଟ୍‌ କମ୍‌ର ଆଶା ଓ ବିଶ୍ବାସ ।