Upload New File

Data Collected/Odia/IIIT-BH/Monolingual-corpora/odiasahitya.com/sent_odiasahitya_lekha_49

+ଡକେଇତି
+ଫତୁରାନନ୍ଦ
+ତା: ସେପ୍ଟେମ୍ବର୍ ୧୫, ୨୦୧୨  
+ମୂଳ ପୃଷ୍ଠା → ସ୍ମରଣୀୟ ଲେଖା → ଗଳ୍ପ →
+ପଧାନ ଘରର ପୁରିଉଠିଥିବା ଶିରୀ ଦେଖି ଆଖପାଖରେ ଲୋକମାନେ ଅଥୟ ହୋଇପଡ଼ିଲେ ।
+ସମସ୍ତଙ୍କ ମୁହଁରେ ଖାଲି ହାଇ ହାଇ ।
+କାହାର ଛାତି କରତି ନ ହେଉଛି, ଏମିତି ଜଣେ ପାଇବନି ।
+ଚାରି ପାଞ୍ଚଜଣ ଏକାଠି ହେଲେ ଉଠିଲା ତା‘ରି କଥା ।
+ଦିନେ କହୁ କହୁ ଶଙ୍କରା କହିଲା, ‘ଲକ୍ଷ୍ମୀ ପଶିଲାବେଳେ ଏମିତି ପେଲି ପଶନ୍ତି ।
+କୋଉ ଶିରା ଦେଇ ନଡ଼ିଆରେ ପାଣି ପଶୁଛି କିଏ ଜାଣେ ? ସେମିତି ପଧାନ ଘରେ କୋଉବାଟେ ଲକ୍ଷ୍ମୀ ପଶୁଛନ୍ତି କିଏ କହିବ ?’ ଏହା ଶୁଣି ବନା କହିଲା, ମୁଁ କହିବି, ଗୋଟିଏ ବାଟ ନୁହେଁ, ଯେତେ ବାଟ ଅଛି ସବୁ କହିବି ।
+କାନ୍‌ତରାଟି, କେନ୍ଦୁପତ୍ର ଠିକାଦାରି, କଳା ବେପାର, ମହାଜନି ଆଦି ଏତେ ବାଟ ।
+ସବୁ ବାଟରେ ଲକ୍ଷ୍ମୀ ଧଇଁସଇଁ ହୋଇ ପଶୁଛନ୍ତି ।
+ବେଲୁନ ପରି ତା’ଘରଟା ଫୁଲିବାରେ ଲାଗିଛି ।
+ଜଣେ କହିଲା ‘ବେଶି ଫୁଲିଲେ ଠୋଃ ହୋଇଯିବ ।’
+ବନା କହିଲା, ‘ରାମ୍‌ବୋଲ-ଫାଟିବାର କିଛି ଲକ୍ଷଣ ଦିଶୁନାହିଁ ।
+ଆମ ପିଲାଏ ଅବା ତା ଠୋଃ କୁ ଦେଖିବେ ।
+ଏକ୍ଷଣି ତାର ଫୁଲିବାର ସମୟ ।’ 
+ଆଉ ଜଣେ କହିଲା, ‘ସେ ବ୍ରହ୍ମଶୋଷା ପଧାନ ଗଇଁଠା ପାଉଁଶ ପରି ଚାରିଆଡ଼ର ସମସ୍ତଙ୍କୁ ଶୋଷି ସିଠା କରିଦେଲାଣି ।’ 
+ଶଙ୍କରା କହିଲା, ‘ସେ କଅଣ ଖାଲି ଗଇଁଠା ପାଉଁଶ, ସେ ଗୋଟାଏ ଲକ୍ଷ୍ମୀ ଯନ୍ତା ।
+ଲକ୍ଷ୍ମୀ ତା’ ଘରକୁ ପଶିଯାଆନ୍ତି, କିନ୍ତୁ ବାହାରିବା ଦେଖିଛ ?’ ସମସ୍ତେ ଏକାବେଳକେ କହି ଉଠିଲେ, ‘ଆରେ ଯା ଯା କାଣିକଉଡ଼ିଟାଏ ତ ବାହାରିବ ନାହିଁ ।
+ପଇସା ତ ଦୂରର କଥା ।
+ଆଉ ବି ତା’ ପଇସା ହଉଛି ଗୋବର ଲେଣ୍ଡା; ଅକସ୍ମାତ ଯେଉଁଠି ପଡ଼ିବ, ସେଠୁ ମାଟି ନେଇ ଉଠିବ ।’
+କେତେଜଣ ଅତି ଅସହଣି ଟୋକା କହିଲେ, ‘ଶଳାର ଘରେ ଡକେଇତ ପୂରେଇଦେବା ।’ 
+ଡକେଇତଙ୍କୁ ଖୋଜି ପାଇବା ବଡ଼ କଷ୍ଟକର ବୋଲି ମତ ପ୍ରକାଶ ପାଇବାରୁ ଜଣେ ମୁରୁକିହସା ଦେଇ କହିଲା- ‘ଡକେଇତଙ୍କୁ ପାଇବା ସିନା ପୁଲିସ ପକ୍ଷରେ କଷ୍ଟ ।
+ଟିକିଏ ଇସାରା ଦେଲାମାତ୍ରେ ଦଶ, ପଚିଶ ଯେତେ ଚାହିଁବ ସେତେ ଆସି ହାଜର ହେବେ ।’ 
+ସମସ୍ତେ ଠିକ୍‌ କଲେ ପଧାନ ଘରେ ଡକେଇତ ପୂରାଇବେ ।
+ଖୋଜି ବସିଲେ ସବୁ କଥାକୁ ଯୁକ୍ତି ମିଳିଯାଏ ।
+ଏମାନଙ୍କର ଯୁକ୍ତି ହେଲା, ଯେହେତୁ ପଧାନ ସମସ୍ତଙ୍କୁ ଶୋଷି ନିଜର ଢୋଲ ବଢ଼େଇଛି ସମସ୍ତେ ତା’ ଘରେ ଡକେଇତ ପୂରେଇ ତାକୁ ଶୋଷିବେ ।
+ଯେସାକୁ ତେସା ନ ହେଲେ ଏ ଦୁନିଆରୁ ନପାରିଲା ଲୋକେ ପୋଛି ହୋଇଯିବେ ।
+କଥାଟା ପକ୍‌କା ହୋଇଗଲା ।
+ଡକେଇତଙ୍କୁ ନିମିତା କରିବାର ଭାର ଜଣକୁ ଦିଆଗଲା ।
+ବନା ଯେତେବେଳେ ଜାଣିଲା ସତକୁ ସତ ଡକେଇତି ବ୍ୟବସ୍ଥା ହେଉଛି ସେ କାନରେ ହାତ ଦେଲା ।
+ସମସ୍ତଙ୍କୁ ଡାକି କହିଲା, ’ଆରେ ଏ କି କଥା, ସମସ୍ତଙ୍କ ମୁଣ୍ଡ ବିଗିଡ଼ି ଗଲାଣି ନା କଅଣ ମ ? ଏମିତିଆ ମୂର୍ଖାମି ତ ମୁଁ କୋଉଠି ଦେଖିନି ।
+କଅଣ ତୁମ ମୁଣ୍ଡରେ ପଶିଛି ମୁଁ ବୁଝିପାରୁନି ।’ 
+ଜଣେ କହିଲା, ‘ଫେର୍‌ ବୁଝେଇବାକୁ ପଡ଼ିବ ? ସବୁ ବାଟରେ ଆମକୁ ଶୋଷି ସେ ଗଣ୍ଡି ବଢ଼େଇଛି ।
+ଆମେ ତାକୁ ଯଦି କୋଉ ବାଟରେ ଶୋଷି ପାରିଲୁ ତେବେ କି ମୁସ୍କିଲ ହୋଇଗଲା-’ ‘ସେ ଯେମିତି ଚାଲାଖିରେ ଶୋଷୁଛି ତମେ ସେମିତି ଚାଲାଖି କରି ଶୋଷୁନ-’ ‘ଶଳାଠୁ ତ ପଇସାଟାଏ ବି ନେଇ ହେଲାନାହିଁ ।
+ସବୁ ଉପାୟରେ ବିଫଳ ହେବାରୁ ସିନା ଏ ବାଟ ଧରିଲୁ ।’
+‘ଖବରଦାର୍‌ ଏ ବାଟ ଠିକ୍‌ ନୁହେଁ ।
+ଠିକ୍‌ ବାଟ ମୋତେ ଜଣା ।
+ତମର ଖାଲି ଶୋଷିବା ଯଦି ଲୋଡ଼ା ତେବେ ମୋ ବାଟରେ ଚାଲ ।
+ଟିକିଏ ଖାଲି ସମୟ ଦରକାର ।
+ଦେଖିବ ସେ ଛାଏଁ ଛାଏଁ ଆସି ତୁମମାନଙ୍କୁ ତା’ ଦେହରେ ଥଣ୍ଟ ଲଗାଇ ଶୋଷିବା ଲାଗି କାକୁତିମିନତି ହେବ ।
+ଏଇଟା ସୁବିଧା ହେବ ନା ଡକାଏତି ସୁବିଧା ହେବ ? ସେଥିରେ ପୁଲିସ୍‌ ବନ୍ଧୁକ, ଘୋଷରା, ମକଦ୍ଦମା, ତା’ ପରକୁ ଓଲଟି ଓକିଲ ଶୋଷା ।
+ଶୋଷିବାକୁ ଯାଇ ଓଲଟି ଶୋଷିତ ହେବ ।’ 
+ସମସ୍ତେ ଗୁଣୁଗୁଣେଇ ଉଠିଲେ- ଏଗୁଡ଼ାକ ଖାଲି ମନଗଢ଼ା କଥା ।
+ବରଜୁ ପଧାନ ଏଡ଼େ ଓଲୁ ନୁହେଁ ।
+ଜାଣିଥାଅ ବନା ବି ଓଲୁ ନୁହେଁ ।
+ପଧାନକୁ ସତର ଘଣାରେ ପାଣି ପିଆଇଲାବାଲା ମୁଁ ।
+ମୋତେ ଦୁଇଟି ମାସ ସମୟ ଦିଅ ।
+ଯଦି କିଛି ଫଳ ନ ହୁଏ ତେବେ ତୁମ ଦେଖିଲା କାମ ତୁମେ କରିବ ।
+ଆଉ ଦେଖ, ମୋ କଥା ଅନୁସାରେ ସମସ୍ତେ ଚଳିବ ।
+ମୋତେ ସର୍ଦ୍ଦାର ବୋଲି ଭାବିବ ।
+ବେଶି ନାହିଁ ମୋଟେ ଦୁଇଟା ମାସ, ସ୍ୟାଡ଼କୁ ପଚାରିଲେ ପଚାରିବ, ନ ପଚାରିଲେ ନାହିଁ ।
+ଏମିତିଆ କଥାରେ କିଏ ବା ରାଜି ନ ହେବ ।
+ପୁଲିସ, ବନ୍ଧୁକ, ଓକିଲ, କଥା ଶୁଣି କେତେଜଣ ଘାବରେଇ ଯାଇଥିଲେ ।
+ସେମାନେ ବି ଟିକିଏ ନିଃଶ୍ବାସ ମାରିଲେ ।
+ସର୍ବସମ୍ମତିକ୍ରମେ ପ୍ରସ୍ତାବଟି ଗୃହୀତ ହୋଇଗଲା ।
+ବନମାଳୀ ବରଜୁ ପଧାନଙ୍କର କାନକୁହା ସାଜିଲେ ।
+ମନ୍ତ୍ରୀ ହେବାରେ ଯେ, ଏତେ ଲାଭ ପଧାନେ ଭାବିପାରି ନ ଥିଲେ; ବନା ତାଙ୍କ ଆଖି ଝଲସେଇ ଦେଲା ।
+ତା’ଦ୍ବାରା ପ୍ରସ୍ତୁତ ଆୟବ୍ୟୟ ତାଲିକା ଦେଖି ପଧାନେ ଏକାବେଳକେ ଭୋଳ ।
+ପ୍ରଥମେ ମାତ୍ର ଚାରିଅଣା ଖର୍ଚ୍ଚ ।
+ଗୋଟିଏ କଂଗ୍ରେସ ମେମ୍ବର ହେବାକୁ ପଡ଼ିବ ।
+ଜିଲ୍ଲା ଓ ପ୍ରାଦେଶିକ ମେମ୍ବରଙ୍କ ମୁହଁ ଚିକଣେଇବାରେ ହଜାରେ ଦୁଇହଜାର ଯିବ ।
+ଟିକଟ ପାଇବାର ଗୁଞ୍ଜାଗୁଞ୍ଜି ରେ ଦି’ ହଜାର, ଭୋଟ ଲଢ଼େଇରେ ଅତି କମ୍‌ରେ ଦଶହଜାର, ଗାଏମୋଟ ଚଉଦ ବା ପନ୍ଦର ହଜାର ଖର୍ଚ୍ଚ ।
+ମନ୍ତ୍ରୀ ହେବା ପରେ ଗୋଟାଏ ଗୋଟାଏ ଥୋପରେ ୩୦/୪୦ ହଜାରରୁ କମ୍‌ ମିଳିବ ନାହିଁ ।
+ତା’ ଉପରେ ପୁଣି ଦରମା ୫ ବର୍ଷକୁ ମୋଟାମୋଟି ଦେଢ଼ ଲକ୍ଷ ।
+ତା’ ଉପରକୁ ପୁଣି ଗସ୍ତଖର୍ଚ୍ଚ ଅଛି ।
+ପଧାନଙ୍କ ଆଖି ଖୋସି ହୋଇଗଲା ।
+ସେ ବନାକୁ ଜକଟି ମକଟି ଧରିଲା ।
+ତଳିଆ ଆଡ଼ୁ ଦିହ ଉଲୁସି ଉଠିଲା ।
+ଅତି ବିଶ୍ବାସରେ ବନାକୁ ପଚାରିଲା- ‘ଆଛା ମୁଁ ତ ପାଠଶାଠ ସେମିତି କିଛି ପଢ଼ିନି ।’ 
+ବନା ଖେଁ ଖେଁ ହୋଇ ବହେ ହସିସାରିବା ପରେ କହିଲା, ‘ସେଥିପାଇଁ ତ ପାଠ ବିଲ୍‌କୁଲ୍‌ ଦରକାର ନାହିଁ ।
+ସବୁକାମ ସେକ୍ରେଟାରୀ, କିରାନିମାନେ କରିଦେବେ ।
+ ତୁମେ ଖାଲି ମଞ୍ଜୁର କରି ଲେଖି ଦସ୍ତଖତ୍‌ ମାରିପାରିବନି ?’
+‘ହଁ ହଁ, ତା’ ପାରିବି ।
+ଇଂରେଜୀରେ ବି ଦସ୍ତଖତ୍‌ କରିଦେଇ ପାରିବି ।’
+‘ଏଁ ତମେ ୟା’ ଭିତରେ ଇଂରେଜୀରେ ଦସ୍ତଖତ୍‌ କରି ଶିଖିଲଣି ?’
+‘ହଁ ହଁ, ଚେକ୍‌ ଫେକ୍‌ରେ ବହୁତ ଦସ୍ତଖତ୍‌ ଦେବାକୁ ପଡ଼ିଲା ।
+ବହୁତ ପରିଶ୍ରମ କରି ସେଇଟା ଶିଖିନେଲି ।
+ସେତିକି ନୁହେଁ, ଚାରିଣିଆ ଉଆର୍ଡ଼୍‌-ବୁକ୍‌ଟା ଘୋଷି ମୁଖସ୍ଥ କରିଦେଇଛି ।’
+‘ତେବେ ତ କି କିସ୍ତୀମାତ୍‌ ।
+ଆଉ ଚିନ୍ତାନାହିଁ ! ସେଠି ଖାଲି ଟଙ୍କା କାରବାର ।
+ହିସାବ କିତାବରେ ତୁମକୁ କେହି ବଳିଯିବେ ନାହିଁ ।’
+‘ସେଥିରେ ପୁଣି ମୋତେ କିଏ ପାରିବ ? କେତେ ଇନ୍‌କମ୍‌ ଟିକସ ଅଫିସର, କେତେ ସେଲ୍‌ ଟିକସ ଅଫିସରଙ୍କୁ ଭୁଆଁ ବୁଲେଇ ଦେଇଛି ।
+ପୁଅମାନେ ସମସ୍ତେ କାନମୁଣ୍ଡା ଆଉଁସି ଫେରିଯାଇଛନ୍ତି ।
+‘ବାସ୍‌ ବାସ୍‌, ଆଉ କିଛି ଚିନ୍ତା ନାହିଁ ।
+ଆଉ ଦେଖ ମୁଁ କାମରେ ଲାଗିଲି ।
+ତୁମେ ତ ଜାଣ ବେପାରରେ କେମିତି ଟଙ୍କା ଲଗାଇବାକୁ ହୁଏ ।
+ବଖତ ବେଳକୁ ଗାଞ୍ଜିଆ ଚିପିଲେ ଚଳିବ ନାହିଁ ।
+ଚାଲିଲି ମୁଁ କଂଗ୍ରେସ ଅଫିସ ।’ 
+ତାଡ଼ାଏ ବାଘୁଆ ନୋଟ୍‌ ତା’ ହାତରେ ଗୁଞ୍ଜିଦେଇ ପଧାନ ତାକୁ ବିଦାୟ ଦେଲା ।
+ବନାକୁ ସଦଳବଳ କଂଗ୍ରେସ ଅଫିସ୍‌ରେ ଦେଖିବାମାତ୍ରେ ସମ୍ପାଦକ ତଥା ସଭାପତି ଏକାବେଳେକେ ଆନନ୍ଦରେ ଅଥୟ ।
+ପ୍ରଶ୍ନ ଉପରେ ପ୍ରଶ୍ନ- ଆଜ୍ଞା କେମିତି ଅଛନ୍ତି, ପିଲାପିଲି ଭଲ ତ ।
+ଆମ୍ଭମାନଙ୍କୁ ଭୁଲିଗଲେ କି, ଆପଣଙ୍କ ଥାନାର ହାଲଚାଲ କ’ଣ-ଅନୁରୋଧ ଉପରେ ଅନୁରୋଧ- ଏଠି କିଛିଦିନ ରହନ୍ତୁ ।
+କିଛି ଜଳଯୋଗ ନକରାଇ ଛାଡ଼ିବୁ ନାହିଁ ।
+ଏଇଟା ଆପଣଙ୍କ ଘର, ଏଇଠି ରହନ୍ତୁ, କାହିଁକି ଆଉ କାହା ଘରକୁ ଯିବେ, ଖିଆପିଆ ବନ୍ଦୋବସ୍ତଟା ଏଇଠି ହେଉ ଇତ୍ୟାଦି ।
+ଛଡ଼ିଦାରସହ ପଣ୍ଡାଏ ଯାତ୍ରୀଙ୍କୁ ପାକଳେଇବାଠାରୁ ଏମାନଙ୍କର ପାକଳାପାକଳି ଢେର୍‌ ଢେର୍‌ ବଳିଗଲା ।
+ବନା ଓ ତା’ ସଙ୍ଗୀମାନେ ମନେମନେ ଭାବୁଥାନ୍ତି ଆ-ହା-ହା-ହା କେତେ ଦରଦ, ଅଲାଜୁକଙ୍କ ଦରଦ ମୁଣି ଫାଟିଯାଇଛି ।
+ବର୍ଷେ ଦି’ ବର୍ଷ ତଳେ ୟାଙ୍କଠି ତେଲ ଲଗେଇ ଲଗେଇ ହାତ ବିନ୍ଧିଲା ପଛେ ଦୃଷ୍ଟି ଟିକଏ ପଡ଼ୁ ନଥିଲା ।
+ବେହିଆ, ଥୋବରା ଭାବିଛନ୍ତି ନିର୍ବାଚନ ଦୁଇମାସ ବୋଲି ଆମେ ଜାଣିନୁ ।
+ସୀମା ଆନ୍ଦୋଳନ ବେଳର ପୁଲିସ୍‌ ଠେଙ୍ଗୁଣି ଆମେ ଭୁଲିଯାଇଛୁ ।
+ବଚ୍ଚା, ତୁମେ ଡାଳେ ଡାଳେ ଗଲେ ଆମେ ପତ୍ରେପତ୍ରେ ଯିବୁ ।
+ପାଞ୍ଚବର୍ଷ ଅତ୍ୟାଚାରର ବଦଲା ଏଇ ଦୁଇ ମାସରେ ନେବୁ ।
+ମନକଥା ମନରେ କିନ୍ତୁ ବାହାର କଥାଟା ଠିକ୍‌ ଓଲଟା ।
+ବହୁ ବୁଝାବୁଝି ପରେ ସୁଦ୍ଧା ସଭାପତି ଟିକିଏ କୁନ୍ଥୁକୁନ୍ଥୁ ହେବାରୁ ବନା ତାଙ୍କୁ କଡ଼ ଘରକୁ ଡାକିନେଇ ସାଫ୍‌ ସାଫ୍‌ କହିଦେଲା- ଦେଖ ପଧାନକୁ ଟିକଟ ନ ଦେଲେ ସେ ସ୍ବାଧୀନ ଭାବରେ ଠିଆ ହେବ ।
+ଟଙ୍କା ଦେଇ ଭୋଟ୍‌ କିଣିବା ପାଇଁ ତା’ର ଅକଳନ୍ତି ଟଙ୍କା ଅଛି ।
+ତୁମେ ଖୁବ୍‌ ଦେଲେ ଛ’ହଜାର ଦେବ ।
+ତୁମେ କିଛି ନଦେଲେ ବି ସେ ଛ’ର ଛଅ ଗୁଣ ଖର୍ଚ୍ଚ କରିପାରିବ ।
+ତୁମେ ଟିକଟ ଦିଅ ।
+ସେ ଛ’ ହଜାର ଛାଡ଼ିଦେବ ।
+ମୋତେ ହଜାରେ ଦେଇ ତୁମେ ପାଞ୍ଚ ହଜାର ବାଣ୍ଟିନେବ ।
+ଏତକ ନ କଲେ ଆମେ ସମସ୍ତେ ପଧାନ ପାଇଁ କାମ କରିବୁ ।
+ସଭାପତି ଏକାବେଳେକେ ପାଣି ହୋଇଗଲେ ।
+ଗଡ଼ ଜୟକରି ବନା ସଦଳବଳ ଫେରିଲା ।
+ଭୋଟ୍‌ ଲଢ଼େଇ ଯହୁଁ ଯହୁଁ ଗରମ ହେଉଥାଏ, ପଧାନ ତହୁଁ ତହୁଁ ବନାକୁ ବେଶି ଜକଟି ମକଟି ଧରୁଥାଏ ।
+ଏଇ ବନା ଲାଗି ସିନା ତା’ର ଉନ୍ନତି ।
+ଆଜି ମୁତଫରକା କର୍ମୀଠାରୁ ଆରମ୍ଭ କର ପ୍ରଧାନମନ୍ତ୍ରୀ ପର୍ଯ୍ୟନ୍ତ ତା’ ଘରେ ଅତିଥି ।
+ନିତି ତା’ ଘରେ ବାହାଘର ମଉଛବ ।
+ବନା ଏକାବେଳେକେ ଦୁଇ ଫାଳ ।
+ଗୋଟିଏ ଫାଳ ପଧାନକୁ କହି ଲାଗେ- ଖୋଲ ମୁଣି ଖୋଲ ।
+ମନେରଖ ଖାଲି ଦରମା ଦେଢ଼ଲକ୍ଷ, ୟାର ବହୁଗୁଣ ଉପୁରି ।
+ଆଉ ଆର ଫାଳଟା ଫୁସ୍‌ଫୁସ୍‌ କରି ଲୋକଙ୍କ କାନରେ କହେ- ମେଘ ବରଷୁଛି ପିଇଯାଅ ପାଣି ।
+ମେଘ ତୁମରି ପରି ହ୍ରଦ, ପୋଖରୀ, ଗଡ଼ିଆ, ଟୁବରୁ ପାଣି ଶୋଷି ଶୋଷି ନେଇଥିଲା; ମୁଁ ତାକୁ କାଲୁଆ କରିଛି ।
+ସେ ଏବେ ବରଷୁଛି ।
+ପାଣି ଯେଉଁଠୁ ଯାଇଥିଲା, ଠିକ୍‌ ସେହିଠାକୁ ଫେରି ଆସିବ ।
+ହୁସିଆର ହୋଇ ପିଇଯାଅ ।
+କିନ୍ତୁ ଖବରଦାର, ପଇସା ଖାଇ ଇଜ୍ଜତ ବିକନା, ବୁଝି ସମଝି ଭୋଟ ଦିଅ ।
+ପଇସା ଲୋଭରେ ଯେମିତି ମା ଭଉଣୀଙ୍କୁ ନ ବିକ ।
+ଏ ବେପାରରେ ୪୦ ହଜାର ଟଙ୍କା ଖଟେଇ ସାରିବା ପରେ ପଧାନ ବନାମୁହଁକୁ ଚାହିଁଲା ।
+ବନା ଆଶ୍ବାସନା ଦେଇ କହିଲା ଭୟ ନାହିଁ ଭୋଟର ସଂଖ୍ୟା ଯେତେ ଆମର କର୍ମୀ ତା’ର ପାଖାପାଖି ।
+ବେପାରରେ ଟଙ୍କା ଲଗାଣ ମୁଁ କଅଣ ତୁମକୁ ଶିଖେଇବି ।
+ଲାଭକୁ ମନରେ ରଖି ଟଙ୍କା ଲଗାଅ ।
+ଏତେବେଳେ ଟିକିଏ ପଛେଇଲେ ଏ ଚାଳିଶି ହଜାର ପାଣିରେ ପଡ଼ିବ ।
+ଖବରଦାର୍‌ ! ପଧାନ ଡରିଯାଇ ଟ୍ରେଜେରି ମେଲା କରିଦେଲା ।
+ପାରାଭାଡ଼ି ଖୋଲିଦେଲେ ଯେପରି ପାରାଗୁଡ଼ିକ ଫଡ଼୍‌ଫାଡ଼୍‌ ହୋଇ ପଦାକୁ ଉଡ଼ି ଆସନ୍ତି, ଟ୍ରେଜେରି ଖୋଲା ହୋଇଯିବାରୁ ଅବରୁଦ୍ଧ ନୋଟ୍‌ଗୁଡ଼ାକ ପଡ଼୍‌ଫାଡ଼୍‌ ପଦାକୁ ଉଡ଼ି ଆସିଲେ ।
+ବନାଦଳିଆ ଟୋକାମାନେ କରୁଳି ଉଠିଲେ ।
+କାଳେ କେହି ବିରୁଦ୍ଧଦଳିଆ ପଧାନ କାନରେ ଫୋଡ଼ିଦେବ ଯେ ସେ ତାକୁ ଭଣ୍ଡେଇ ପଇସା ଲୁଟିବାରେ ଲାଗିଛି, ସେଥିଲାଗି ବନା ଆଗରୁ ସତର୍କ ହୋଇ ପଧାନକୁ ଜଣେଇଦେଲା, ‘ଦେଖ ବିରୁଦ୍ଧବାଲା ଏକାବେଳେକେ ଆଣ୍ଠେଇ ପଡ଼ିଲେଣି ।
+ତାଙ୍କର ଭୟ ହେଲାଣି ଯେ ଡ଼ିପୋଜିଟ୍‌ ଟଙ୍କା ବି ଉଡ଼ିଯିବ ।
+ସିଧା ବାଟରେ ନ ପାରି ସେମାନେ ବଙ୍କା ବାଟ ଧରିବେ ବୋଲି ମୁଁ ଶୁଣିପାରୁଛି ।
+ମୁଁ ତୁମ ଟଙ୍କାଗୁଡ଼ିକ ବିନର୍ବ୍ୟୟ କରିଦେଉଛି ବୋଲି କହି ତୁମକୁ ବିଗିଡ଼େଇ ଦେବାକୁ ବସିଲେଣି ।
+କିଏ କେଉଁ ଉଦ୍ଦେଶ୍ୟ ରଖି କଅଣ କହୁଛି ସେଥିପ୍ରତି ଟିକିଏ ହୁସିଆର ରହିବ ।
+ଏତିକିବେଳକୁ ଆଉ ଜଣେ ନସର ପସର ହୋଇ ଧାଇଁ ଆସି କହି ପକେଇଲା- ‘କାଲି ଆର ପାଖର ମୁଣ୍ଡିଆମାନେ ମନ୍ତ୍ରଣା କରୁଥିଲେ, କେମିତି ବନାକୁ ପଧାନଠାରୁ ଛଡ଼େଇ ନେବେ ।
+ଜଣେ କହିଲା ବନା ବିରୁଦ୍ଧରେ ଗୁଡ଼ାଏ ଲଗେଇଜୁଟେଇ କହିଲେ ତା’ର ନିଶ୍ଚୟ ଅବିଶ୍ବାସ ଜାତ ହେବ ।
+ଆଉ ବନା ଯେପରି ଖାଣ୍ଟି ଲୋକ, ସେ ପଧାନର ଟିକିଏ ଅବିଶ୍ବାସ ଦେଖିଲେ ସଙ୍ଗେ ସଙ୍ଗେ ଅଲଗା ହୋଇଯିବ ।
+ବନା ଅଲଗା ହେଲେ କାମ ଫତେ ।’
+ଶୁଣିଲାମାତ୍ରେ ପଧାନ ବନାକୁ ଜାବୁଡ଼ିଧରି, ମୁରୁକିହସା ଦେଇ କହିଲା- ‘ଓହୋ ! ମୋତେ କେଡ଼େ ଓଲୁ ବୋଲି ବିଚାରିଛନ୍ତି ।
+ବନୁକୁ ପୁଣି ମୋଠାରୁ ଛଡ଼େଇ ନେବେ ।
+ଦେଖି କାହାର ଦଉଡ଼ କେତେ ।’
+ଭୋଟ୍‌ ଦିଆହେବା ଦିନ, ପଧାନ ଛାମୁଡ଼ିଆ ତଳେ ସବୁ ଭୋଟରଦଳ ହାଜର ।
+ବିରୁଦ୍ଧଦଳିଆଙ୍କ ଥାନରେ କୁଆ ଉଡ଼ୁଥାଏ ।
+ସବୁ ଭୋଟନିଆ ଜାଗାରେ ଏକା କଥା ।
+ବନା ସବୁ ଥାନରେ ଶେଷ ଖିଆପିଆର ଧୁମ୍‌ ଲଗେଇ ଦେଇଥାଏ ।
+ବେଳେବେଳେ ଜଣ ଜଣକୁ ଆଖିଠାର ମାରି ଫୁସ୍‌ଫୁସ୍‌ କରି କହି ଦେଉଥାଏ ଭଲକରି ଖାଅ, ଖୁଆଅ, ଏଇ ଶେଷଖିଆ ।
+ନିର୍ବାଚନ ଫଳ ବାହାରିଲା ।
+ପଧାନ ଘର ଶୂନ୍‌ଶାନ ପଡ଼ିଗଲା ।
+ପଧାନ ବିଚରା କତରା ଧରିଲା ।
+କିନ୍ତୁ ଆଉ ଏକ ଗାଁରେ ଥିବା ଏକ ଘରେ ବନାକୁ ସମ୍ବର୍ଦ୍ଧନା କରିବାକୁ ଦଳେ ଟୋକା ଜମିଥାଆନ୍ତି ।
+ବନା ସେମାନଙ୍କୁ କହିଲା- ତୁମେ ଯେଉଁ ଡକେଇତି କରିବ ବୋଲି ବସିଥିଲ ସେଇଟା ଭଲ ନା ଏଇଟା ଭଲ ।
+ପଧାନ ଡାକିଡ଼ୁକି ତୁମ ସମସ୍ତଙ୍କୁ ନେଲା, ଡକେଇତି କରିବାକୁ ଟ୍ରେଜେରି ଖୋଲିଦେଲା ।
+ଡକେଇତି ସରିବା ପରେ ଦିବ୍ୟ ରାଜାଘର ଖାନା ଦେଇ ବିଦା କଲା ।
+ଏଥିରେ ପୁଲିସର ବଡ଼ବୋପା ବି କିଛି କରିପାରିବ ନାହିଁ ।
+ସବୁଠାରୁ ବଡ଼ ଭୟ ଥିଲା ଇଜ୍ଜତ୍‌ ।
+ତାହା ବି ଆମ ଗାଁଆ ଲୋକେ ବଜାଏ ରଖିଛନ୍ତି ।
+ପଇସା ଲୋଭରେ ନିଜିନିଜର ମାଇପ ବିକିନାହାନ୍ତି ।
+ଆନନ୍ଦର କୋଳାହଳ ଭିତରେ ବନାର କଥାଗୁଡ଼ାକ ଲୁଚିଗଲା ।