Upload New File

Data Collected/Odia/IIIT-BH/Monolingual-corpora/odiasahitya.com/sent_odiasahitya_lekha_5

+ଦେବଲୋକରେ ପରୀକ୍ଷା ପାଲା
+ହରେକୃଷ୍ଣ ଦାସ
+ତା: ମେ ୧, ୨୦୧୯  
+ମୂଳ ପୃଷ୍ଠା → ସ୍ମରଣୀୟ ଲେଖା → ଗଳ୍ପ →
+ଦେବଲୋକରେ ଅଫିସରମାନେ ନୂଆ ନୂଆ ଆଇନ୍‌କାନୁନ୍‌ ବିଷୟରେ କିଛି ଖବର ରଖିଲେ ନାହିଁ ।
+ସେହି ମାନ୍‌ଧାତା ଅମଳର ଆଇନ୍‌କୁ ଧରି ଦେଶ ଶାସନ କଲେ ।
+ଫଳରେ ଦେବଲୋକରେ ବିକାଶମୂଳକ କାର୍ଯ୍ୟର ଅଗ୍ରଗତି ହେଲାନାହିଁ ।
+ଏକଥା ଅନୁଭବ କଲା ପରେ-ରାଷ୍ଟ୍ରପତି ବିଷ୍ଣୁ ଉପାୟ ଚିନ୍ତା କଲେ ।
+ଗଣେଶ ତାଙ୍କୁ ପରାମର୍ଶ ଦେଇ କହିଲେ-“ଅଫିସରମାନଙ୍କର ଆଇନ-ଜ୍ଞାନ ପରୀକ୍ଷା କରିବା ପାଇଁ, ଥରେ ବିଭାଗୀୟ ପରୀକ୍ଷା ହେଉ ।
+ପରୀକ୍ଷାରେ ଯେଉଁମାନେ ଶତକଡ଼ା ଷାଠିଏ ନମ୍ବରରୁ କମ୍‌ ରଖିବେ, ସେମାନଙ୍କୁ ଚାକିରିରୁ ବାହାର କରିଦିଆଯାଉ ।”
+ଏକଥା ରାଷ୍ଟ୍ରପତିଙ୍କ ମନପସନ୍ଦ ହେଲା ।
+ସେ ସଙ୍ଗେ ସଙ୍ଗେ ପରୀକ୍ଷାର ଦିନବାର ସ୍ଥିର କରି ଇସ୍ତାହାର ପ୍ରକାଶ କଲେ ।
+ପରୀକ୍ଷା ଦେବା କଥା ଶୁଣୁଶୁଣୁ ଅଫିସରମାନଙ୍କର ପିଚା ପରାସ ହେଲା ।
+ଅବକାରୀ କମିଶନର ମହାଦେବ କହିଲେ-“ ମୁଁ ସିଲେକ୍‌ସନ୍‌ ଗ୍ରେଡ୍‌ ପାଇସାରିଲିଣି ।
+ମୋର କେତେ କାମ କରିବାକୁ ଅଛି ।
+କେଉଁଠି ଗଞ୍ଜେଇ ଚାରା ଲଗାଯିବ, କେଉଁ ଶିଳରେ କେତେ ମସଲା ଦେଇ ଭାଙ୍ଗ ବାଟିଲେ, ଠିକ୍‌ ନିଶା ଧରିବ, କେଉଁ ଡିଜାଇନ୍‌ରେ ଚିଲମ ତିଆରି ହେଲେ ଧୂଆଁ ଠିକ୍‌ ବାହାରିବ, ଏସବୁ ଗବେଷଣା କରିବାକୁ ମୋର ବେଳ ଅଣ୍ଟୁ ନାହିଁ ।
+ମୁଁ ପୁଣି ପରୀକ୍ଷା ଦେବି କେତେବେଳେ ? କମାଣ୍ଡର-ଇନ୍-ଚିଫ୍‌ କାର୍ତ୍ତିକେୟ ରାଗିଉଠିଲେ-ଶାଲା ଗଣେଶ, ମୋ ଭାଇ ହେଲେ କ’ଣ ହେବ ? ପରମ ଖୋସାମଦିଆ ।
+ଏସବୁ ତାରି କାଣ୍ଡ ।
+ତାକୁ ସୁବିଧା ପାଇଲେ ଅନ୍ଧାରିଆ ଉତ୍ତମ-ମଧ୍ୟମ ଦେବି ।”
+ପୁଲିସ କମିଶନର ଚିତ୍ରସେନ କହିଲେ- “ଦେଖ୍‌ ଲେଙ୍ଗେ-ଶାଲା ଥନ୍ତଲପେଟାକୁ-ବାଟରେ ପାଇଲେ ତା’ ନାଁରେ ପାଞ୍ଚ ଆଇନ୍‌ କେସ୍‌ ଠୁଙ୍କି ଦେବି ।
+ନହେଲେ ଚୋର ପଠେଇ ତା’ଘରେ କଳାକନା ବୁଲେଇ ଦେବି ।”
+ଟ୍ରେଜେରି ଅଫିସର କୁବେର ଧମକ ଦେଲେ-ଏହି ମାସରୁ ଗଣେଶାର ଦରମା ବନ୍ଦ କରିଦେବି ।
+ତା’ର ଯେତେ ଗସ୍ତ ଖର୍ଚ୍ଚା ବିଲ୍‌ ଟ୍ରେଜେରିରେ ପଡ଼ିରହିଛି, ସେ ସବୁକୁ ନର୍ଦ୍ଦମାରେ ଫିଙ୍ଗିଦେବି ।
+ଜେଲ୍‌ଖାନା ସମୂହର ଡାଇରେକ୍ଟର ଯମରାଜ କହିଲେ-“ମୁଁ ଧର୍ମରାଜ ।
+ମୋ ହେଡ୍‌କିରାନି ଚିତ୍ରଗୁପ୍ତ ଯାହା ଲେଖିଦିଏ, ମୁଁ ସେଥିରେ ଆଖିବୁଜି ସନ୍ତକ କରେ ।
+ ମୋର ପରୀକ୍ଷା ଦେବା କି ଦରକାର ?
+ଚିଫ୍‌ ଫାୟାର ଅଫିସର ଅଗ୍ନିଦେବ କହିଲେ-“ମୁଁ ପୋଡ଼ିବା ଜାଳିବା କାମ ଜାଣେ ।
+କଲମ ସହିତ ପରୀକ୍ଷା ଖାତା ଜାଳିଦେବି ।”
+ସ୍ୱାସ୍ଥ୍ୟ ନିର୍ଦ୍ଦେଶକ ଅଶ୍ୱିନୀ କୁମାର କହିଲେ- “ ଧନ୍ୱନ୍ତରୀଠାରୁ ଆରମ୍ଭ କରି ଚରକ ଶୁଶ୍ରୁତ ମୋ’ଠାରୁ ଡାକ୍ତରୀ ପାଠ ଶିଖିଛନ୍ତି ।
+ ମୋ ପାଇଁ ଗୋଟିଏ କି ପରୀକ୍ଷା ଦରକାର ? ”
+ଏହା ପରେ ଚିଫ୍‌ ଇଞ୍ଜିନିୟର(ସିଭିଲ୍‌) ବିଶ୍ୱକର୍ମା ଓ ଚିଫ୍‌ ଇଞ୍ଜିନିୟର(ଟେକ୍‌ନିକାଲ୍‌) ମୟଦୈତ୍ୟ, ଜଳସମ୍ପଦ ନିର୍ଦ୍ଦେଶକ ‘ବରୁଣଦେବ’ ଆକାଶପଥ ଓ ପରିବହନ ନିର୍ଦ୍ଦେଶକ ‘ମରୁତ’ ପ୍ରଭୃତି ଅଫିସରମାନେ ପରୀକ୍ଷା ଦେବାକୁ ନାପସନ୍ଦ କଲେ ଓ ପ୍ରତିବାଦ କଲେ ।
+ଶେଷରେ ମୁଖ୍ୟ ଶାସନ ସଚିବ ଇନ୍ଦ୍ରଦେବ କହିଲେ-‘ମୋ ପକ୍ଷରେ ପରିକ୍ଷା ହଲରେ ବସିବା ଲଜ୍ଜାକର ବ୍ୟାପାର ।”
+ପରୀକ୍ଷା ପାଇଁ ବେଦବ୍ରହ୍ମାଙ୍କୁ କୁଳପତି ରୂପେ ବଛାଗଲା ।
+ସେ ପରୀକ୍ଷାର ସିଲାବସ୍‌ ସ୍ଥିର କଲେ ।
+ଦେବୀ ସରସ୍ୱତୀ, ଦେବଗୁରୁ ବୃହସ୍ପତି, ଦୈତ୍ୟଗୁରୁ ଶୁକ୍ରାଚାର୍ଯ୍ୟ ପ୍ରଭୃତି ପ୍ରଶ୍ନପତ୍ର ତିଆରି କରିବାର ଦାୟିତ୍ୱ ନେଲେ ।
+ଧ୍ରୁବଲୋକରୁ ଧ୍ରୁବଙ୍କୁ ଅଣାଯାଇ ସେଣ୍ଟର ସୁପରିଣ୍ଟେଣ୍ଡେଣ୍ଟ କରାଗଲା ।”
+ସପ୍ତର୍ଷିମଣ୍ଡଳରୁ କ୍ରତୁ, ପୁଲହ, ପୁଲସ୍ତ୍ୟ, ଅତ୍ରୀ, ଅଙ୍ଗିରା, ବଶିଷ୍ଟ ଓ ମରିଚଙ୍କୁ ପରୀକ୍ଷକ କରାଗଲା ।
+ମହାମୁନି ବିଶ୍ୱାମିତ୍ର ମୁଖ୍ୟ ପରୀକ୍ଷକ ହେଲେ ।
+ରମ୍ଭା, ମେନକା, ଉର୍ବଶୀ ପ୍ରଭୃତି ଅପ୍‌ସରାମାନେ ଇନ୍‌ଭିଜିଲେଟର ହେଲେ ।
+ଦେବସଭା ହଲ୍‌କୁ ପରୀକ୍ଷା ହଲ୍‌ କରାଗଲା ।
+ପ୍ରଶ୍ନପତ୍ର ସବୁ ଗୋପନରେ ତିଆରି ହେଲା ପରେ, ସେ ସବୁକୁ ଗଣେଶ ଜଂଘତଳେ ମାଡ଼ି ବସିଲେ ।
+ଅଫିସରମାନେ ଭାବିଥିଲେ-ପ୍ରଶ୍ନପତ୍ର ସବୁ ଆଗତୁରା ପାଇଥିଲେ, ଦେଖିଲା କାମ କରିଥାନ୍ତେ ।
+କିନ୍ତୁ ଗଣେଶ ପ୍ରଶ୍ନପତ୍ର ସବୁ ଜଂଘତଳେ ମାଡ଼ି ବସିବାରୁ କିଛି ସୁବିଧା ହେଲା ନାହିଁ ।
+ସେଥିପାଇଁ ସମସ୍ତେ ଚିନ୍ତାରେ ପଡ଼ିଗଲେ ।
+ଦେବର୍ଷି ନାରଦ ଦେବଲୋକରେ ଲୋକସମ୍ପର୍କ ଅଫିସର ।
+ସେ ବୁଦ୍ଧି ଦେଲେ “ ଗଣେଶଙ୍କ ବାହନ ମୂଷିକ ମହାରାଜଙ୍କୁ ଧର, ସବୁ ସୁବିଧା ହୋଇଯିବ ।”
+କିନ୍ତୁ ମୂଷିକ ମହାରାଜଙ୍କୁ ଧରିବା ଏତେ ସହଜ ହେଲାନାହିଁ ।
+ବଡ଼ଲୋକର ଡ୍ରାଇଭର ହେବାରୁ ତା’ର ଲାଙ୍ଗୁଳ ମୋଟା ହୋଇଯାଇଛି ।
+ସେଇଠୁ ମୂଷିକରାଜକୁ କିଏ ଧରିପାରେ ସେମିତି ଲୋକ ଖୋଜା ପଡ଼ିଲା ।
+ଖୋଜୁ ଖୋଜୁ ମୂଷିକରାଜର ଶଳଭାଉଜକୁ ଦେଖା ମିଳିଲା ।
+ତାକୁ ବହୁ ଟଙ୍କା ଓ ଗହଣା ଉପହାର ଦେବା ପରେ, ସେ ମୂଷିକରାଜକୁ ହାତ କରିବାକୁ ରାଜିହେଲା ।
+ସୁନ୍ଦରୀ ଶଳାଭାଉଜର ପାଲରେ ପଡ଼ି, ଶେଷକୁ ମୂଷିକରାଜ ପ୍ରଶ୍ନପତ୍ର ଚୋରି କଲା ।
+ଅଫିସରମାନେ ଆଗତୁରା ପ୍ରଶ୍ନସବୁ ଜାଣି ଖୁସି ହେଲେ ।
+କିନ୍ତୁ ପ୍ରଶ୍ନ ସବୁର ଉତ୍ତର ଜାଣି ପରୀକ୍ଷା ଖାତାରେ ସଠିକ ଉତ୍ତର ଲେଖିବା କାହାରି ଦ୍ୱାରା ହେଲା ନାହିଁ ।
+ତେଣୁ ପରୀକ୍ଷାରେ ନିସ୍ତୁକ କପି କରିବାକୁ ସମସ୍ତେ ମିଳିମିଶି ସ୍ଥିର କଲେ ।
+ପରୀକ୍ଷା ଦିନ ସମସ୍ତେ ହାତଟେକି ବସିଛନ୍ତି ।
+କପିକାଗଜ ଏ ପର୍ଯ୍ୟନ୍ତ କାହାରି ପାଖରେ ପହଞ୍ଚି ନାହିଁ ।
+ବାହାରେ କଡ଼ାକଡ଼ି ବ୍ୟବସ୍ଥା ।
+ତଥାପି ଅପ୍‌ସରାମାନେ ବ୍ଲାଉଜ୍‌ ଭିତରେ କପି ଲୁଚାଇ ଅଫିସରମାନଙ୍କୁ ଦେଇଗଲେ ।
+ଦେଲାବେଳେ କେହି ଖିଆଲ କଲେ ନାହିଁ ଯେ-କାହାକୁ କେଉଁ ଉତ୍ତରଟିମାନ ଦିଆଯିବ ।
+ଫଳରେ ଅଶ୍ୱିନୀକୁମାର ମେଡିସିନ୍‌ ବଦଳରେ ଇଞ୍ଜିନିୟରିଂ ଉତ୍ତର ପାଇଲେ ।
+କୁବେର ଟ୍ରେଜେରିକୋଡ୍‌ ବଦଳରେ ମେଡିସିନର ଉତ୍ତର ପାଇଲେ ।
+ଯମରାଜ ଜେଲ୍‌କୋଡ୍‌ ବଦଳରେ ଟ୍ରେଜେରି କୋଡ୍‌ର ଉତ୍ତର ପାଇଲେ ।
+ଇତ୍ୟାଦି ଇତ୍ୟାଦି ।
+ସବୁଗୁଡ଼ାକ ତ ଭୁସ୍‌ ପଣ୍ଡିତ ।
+କିଛି ନ ବୁଝି ଆଖି ବୁଜି ଖାତାରେ ଟିପି ପକେଇଲେ ।
+ଭୁଲ୍‌ ବୁଝିଲା ବେଳକୁ ପରୀକ୍ଷା ଶେଷ ହୋଇ, ଖାତା ସବୁ ଷ୍ଟ୍ରଙ୍ଗ୍‌ ରୁମ୍‌ରେ ରହିଗଲାଣି ।
+ନାରଦ କହିଲେ-“ କିଛି ପରବାୟ ନାହିଁ ।
+ସେଣ୍ଟ୍ରାଲ୍‌ ଭାଲ୍ୟୁଏସନ୍‌ ହେବାବେଳେ ପରୀକ୍ଷକମାନଙ୍କୁ ଧରିନିଅ ।”
+କିନ୍ତୁ ସେଣ୍ଟ୍ରାଲ୍‌ ଭାଲ୍ୟୁଏସନ୍‌ ବେଳେ କୁଳପତି ବ୍ରହ୍ମା କୁଳବୁଡ଼ା କାମ କଲେ ।
+କେତେଜଣ ଅର୍ବାଚୀନ ମୁନିଙ୍କୁ ଧରି ଆଣି ପରୀକ୍ଷକ କରିଦେଲେ ।
+ଏଥିରେ ମୁଖ୍ୟ ପରୀକ୍ଷକ ଟିକିଏ ଆପତ୍ତି କଲେ ।
+କିନ୍ତୁ ଆଗନ୍ତୁକ ଅର୍ବାଚୀନ ପରୀକ୍ଷକମାନେ କହିଲେ-“ ବଶିଷ୍ଠ ମେଡିସିନ୍‌ ବିଷୟରେ କିଛି ଜାଣନ୍ତି ନାହିଁ, ଅଥଚ ସେ ମେଡିସିନ୍‌ ପେପର୍‌ ଦେଖୁଛନ୍ତି ।
+ଅତ୍ରୀ ଇଞ୍ଜିନିୟରିଂର ଆଦ୍ୟ ଅକ୍ଷର ନ ଜାଣି ମଧ୍ୟ, ଇଞ୍ଜିନିୟରିଂ ପେପର୍‌ ଦେଖୁଛନ୍ତି ।
+ଅଙ୍ଗିରା ଜେଲ୍‌କୋଡ୍‌ ଜୀବନରେ ଦେଖିନାହାନ୍ତି, ଅଥଚ ଜେଲ୍‌କୋଡ୍‌ର ସେ ପରୀ କ୍ଷକ ।
+ଏ ସ୍ଥଳରେ ସେମାନେ( ଅର୍ବାଚୀନ ଆଗନ୍ତୁକମାନେ) କାହିଁକି ଖାତା ଦେଖିବେ ନାହିଁ ? ମୁଖ୍ୟ ପରୀକ୍ଷକ ବିଶ୍ୱାମିତ୍ର ଏବେ କେଉଁ ଭଲ ଲୋକକି ? ତାଙ୍କ ଚରିତ୍ର ଖରାପ ବୋଲି ରେକର୍ଡ ଅଛି ।”
+ଦେଖୁ ଦେଖୁ ଖାତା ଦେଖା ସରିଗଲା ।
+ନାରଦ ଗୋପନରେ ଖବର ନେଇ ଜାଣିଲେ ଯେ- ଅଫିସରମାନେ ସବୁ ଫେଲ୍‌ ହୋଇଛନ୍ତି ।
+ତେଣୁ ସେ ଅଫିସରମାନଙ୍କୁ କହିଲେ-“ପାରିବ ଯଦି ଟାବୁଲେଟରମାନଙ୍କୁ ଧର ।
+ସେମାନେ ଚାହିଁଲେ-ଏପାଖ ସେପାଖ କରିଦେବେ ।”
+କିନ୍ତୁ ଟାବୁଲେଟର ହେଲେ ଦୁର୍ବାସା ଓ ଧର୍ମରାଜ ଯୁଧିଷ୍ଠିର ।
+ଏମାନଙ୍କ ପାଖରେ ହେର୍‌ଫେର୍‌ ଚଳିଲା ନାହିଁ ।
+ନାରଦ କହିଲେ-“ ଦେଖ ଏଥର ଆଉ ଗୋଟିଏ ବୁଦ୍ଧି କାଢ଼ିବାକୁ ହେବ ।”
+ନାରଦଙ୍କ ଯୋଜନା ଅନୁସାରେ ଦେବଲୋକରେ ଗୋଟିଏ ନାଚଗୀତର ବ୍ୟବସ୍ଥା ହେଲା ।
+ମହାଦେବ ‘ଡିସ୍‌କୋ’ ଢଙ୍ଗରେ ତାଣ୍ଡବ ନାଚିଲେ ।
+ତାଙ୍କ ସହିତ ସବୁ ଦେବାଦେବୀ ନାଚିଲେ ।
+ଏହି ସୁଯୋଗରେ ନାରଦ ମାୟାବଳରେ ଚୁଟିଆ ମୂଷା ରୂପ ହେଲେ ।
+ସୁଯୋଗ ଉଣ୍ଡି, ମହାଦେବଙ୍କର ଜଟାରୁ ପୁଳାଏ କାଟି ଦେଲେ ।
+ଜଟା ଭିତରୁ ଗଙ୍ଗାଦେବୀ କୁଦାମାରି ତଳକୁ ଡେଇଁ ପଡ଼ିଲେ ।
+ପାଣି ହାବୁକାରେ ନାରଦ ଛିଟିକିପଡ଼ି ଅଣ୍ଟା ଜଖମ କଲେ ।
+ଦେଖୁ ଦେଖୁ ଦେବଲୋକ ଜଳାର୍ଣ୍ଣବ ହେଲା ।
+ପାଣିରେ ପରୀକ୍ଷା ଖାତା, ମାର୍କସିଟ୍‌ ସବୁ ଭାସିଗଲା ।
+ମହାଦେବ ଆସି ଗଙ୍ଗାକୁ ଜଟା ଭିତରକୁ ଫେରେଇ ନେବା ପୂର୍ବରୁ ଗଙ୍ଗାଦେବୀ ବହୁତ କିଛି ଉତ୍ପାତ କରି ସାରିଥିଲେ ।
+ପରୀକ୍ଷା ଖାତା ସବୁ କିମିତି ପାଣିରେ ଡୁବିଲା, ସେ ବିଷୟରେ କୁଳପତି ତଦନ୍ତ କମିଶନ ବସେଇଲେ ।
+ପୂରା ଏକ ବରଷ ପରେ, ତଦନ୍ତ କମିଶନ ରିପୋର୍ଟ ଦେଲେ-“ମହାଦେବଙ୍କ ଜଟା ପୁରୁଣା ହୋଇ ଆପଣାଛାଏଁ ଛିଡ଼ିଗଲା ।
+ତେଣୁ ପାଣି ସେହି ବାଟେ ଲିକ୍‌ କରି, ଖାତାପତ୍ର ଭସେଇ ନେଲା ।
+ଦୁର୍ଘଟଣା ନିତାନ୍ତ ଆକସ୍ମିକ ।
+ଏଥିରେ କାହାରି ଦୋଷ ନାହିଁ ।” 
+ଏ ରିପୋର୍ଟ ପାଇଲା ପରେ କୁଳପତି ସବୁ ଅଫିସରମାନଙ୍କୁ ପାସ୍‌ ବୋଲି ଘୋଷଣା କଲେ ।
+ଏକଥା ଶୁଣି, ଦେବଲୋକର ଅଫିସରମାନେ ନାରଦଙ୍କ ବୁଦ୍ଧିକୁ ଧନ୍ୟ ଧନ୍ୟ କଲେ ।
+ସେହି ଦିନଠାରୁ ଦେବଲୋକରେ ଆଉ ପରୀକ୍ଷା ପାଲା ହୋଇ ନାହିଁ ।
+(ଏହି ଗଳ୍ପଟି ବେଶ୍‌ କିଛିବର୍ଷ ପୂର୍ବେ ଲେଖାଯାଇଥିଲେ ମଧ୍ୟ ଲିଖିତ ପ୍ରସଙ୍ଗଟି ଆଜି ମଧ୍ୟ ପ୍ରାସଙ୍ଗିକ)