KS-KAS-GEN-انہار -KAYINAT-TXT0004-01.txt

یِمن منز خۄدیتیمٲوی نہ آسنس ٲسۍ بٔڑۍ زٕ وجہَ اَکھ یہِ زِ ہمسایہِ جایَن ہندۍ کینٛہہ روزَن وٲلۍ ٲسۍ اوترٕ تامَتھ تہندس غربتَس تہٕ ہژرس اکہِ طرفہٕ کھہہ تہٕ نِلہٕ توٗسۍ ؤنِتھۍ ٹسنہٕ ژٹان تہٕ بیٚیہ طرفہٕ ٲسۍ تِم پانہٕ تہِ “یٮ۪لہٕ تٮ۪بلہٕ“ وَننَس تِتھے  پٲٹھۍ مندچھان ہیٚو یِتھٕ سٲنۍ کٲشرِۍ بٲے پَتھ کالہِ پنجابَس منز “ ہَتو“ بوٗزِتھ ہکہٕ سان کٲشِر کتھ کرنَس مندچھان ٲسۍ۔
مگر پوگلی بولَن والٮ۪ن ہُند ایتماد بحال کرنُک یُس قدم ویرناگٕکۍ پیٖر مشکوٗر مرحوٗم ۱۹۵٠ء ہَس منز تُل تہٕ یتھ ۱۹۵۵ء پتہٕ مےٚ تہِ پننہِ مقدوٗرٕ پوچھر دیُت۔
تمیُک نتیٖجہ درٛاو سٮ۪ٹھا حوصلہٕ افزا۔
از چھِ پوگلی بولہِمنز اکھ درجن کھوٚتہٕ جادٕ نوجوان شٲیِر غزل۔
گیٖت تہٕ مخمس بیترِ لٮ۪کھِتھ ویژھیہ ہندۍ آکھ پُرونٕچ کوٗشِش کران یِمَو منزٕ پوگل خاصٕکۍ عبدالجبار کٹوچ متطور پوگلی، بشیر احمد گنایی ایم- اے- مٲلیگٲمی- نیٖل پر ہندرُک  عبدالحمید ساغر- أرنپیٖژلیُک جلال الدین جلال مخدوٗمی، تہٕ غلام نبی شیدا تہٕ ترنہ ترٛگامُک اکبرملک خاص کٔرِتھ تھٮ۪کنٕۍ لایق چھِ۔
مےٚ چھُ از برٛونہہ سَداہ ؤری پرٛون سہُ واقہ ییٚتہِ نَس یاد پٮ۪وان ییلہ مےٚ پیٖر مشہوٗر پوگلی وَژُن “زٔلۍ گو عالَم“ بوٗزِتھ اَکھ مۄردٕ یا دُم ہۄکھیہ سۭتۍ سپٔدۍ مٔتِس نۄقصانس اوٚش ہاران وُچھے یوو۔
پوگلی بولہِ ہنزن سارِنٕے دلچسٕپ کتھن پانہٕ سام ہٮ۪نہٕ خٲطرٕ تہٕ اَمہِ کِس آگرس پٮ۪ٹھ واتنُک نیب وَننہٕ خٲطرٕ کرٕ بہ یہِ مضموٗن مۄکلاونہٕ برٛونٹھ تَمہِ وَتہِ ہنز نشاندہی پوٚت سوٚن موٚت شٲیِر تہٕ کٲشرِ زٮ۪وِ ہُند توٚت عاشق روٚسُل میٖر بانہالہِ کِس مشہوٗر شٲیِراحمد بانہٲلۍ سٕندِس سۭتۍ باجتِس ووتمُت اوس۔
سہُ آگُر چھُ پوگل پٔرستان۔
پبگل کُن چھےٚ اکھ پٔدۍ وَتھ  ژمل واس، نیٖل تہٕ پرٛہندرٕ منزۍ گژھان۔
اما پوٚز اَز کَل یۄسہٕ پوگل پٔرستان کژھنٕچ سڑک زیرِ تٲمیٖر چھےٚ سۄ چھےٚ بانہال بازرٕ پٮ۪ٹھ جوٚم کُن نیشنل ہای وے یَس پٮ۪ٹھ کاہ میٖل پٔکِتھ مکرکوٗٹ جایہِ أکِس نامکمل لِنک روڈچہِ شکلہِ منز مشرقس کُن نیران تہٕ اَکھ دُ ووٚت بَنان۔ 
اَکھ وَتھ پوگُل مالیگام کُن گژھان بیاکھ پمرستان کُن۔
مالیٖگامٕچ وَتھ چھےٚ کوٗٹھ مَنڑ کھال، تھِنہ، باس تہٕ گوہالا گامَو مٔنزۍ گُزران ییٚلہِ زَن پٔرستانمچ وَتھ دٔچھُن کُن نیٖرِتھ آلیٖنباس تہٕ سیٖنابتی کِنۍ مشہوٗر پوشہِ مرگہٕ شروَادارس پٮ۪ٹھ ختٕم سپدان چھےٚ۔
پوگلی کِس دوٚیمِس لہجس سام ہٮ۪نہِ ترٛگام تام واتنہٕ خٲطرٕ پیٚیہ أکِس وَتہٕ گتَس بانہالہِ پٮ۪ٹھ جوٚم کُن شےٚ سَتھ میٖل پٔکِتھ اَکہِ پہٲڑی وَتہِ کِنۍ ناژلُن، ٲرۍ پینژُل تہٕ موٚنڑپک باس گامَو مٔنزۍ شُمال مغربَس کُن کھسُن۔
بہٕ یژھٕ کٲشِر زبٲنۍ ہنزِ اَہم بولہِ پوگلی ہمچ یہِ سام أکِس تژھِ کَتھِ پٮ۪ٹھ ختم کرٕنۍ یۄسہٕ بوٗزِتھ بوتیمار ہوِس بُتھۍ بیزارَس تہِ وُٹھ کُملاونَس پٮ۪ٹھ مجبوٗر کرِ۔
سۄ کتھ چھےٚ یہِ زِ پوگل پٔرستانہٕ کِس پَتھ وَنَس منز چھُ پوگلی بولہِ وۄپَر زبانَن ہندِ اثرٕ نشہِ بٔچِتھ روزنَس دوران پنہٕ نٮ۪ن کینژن وراثتی لفظن للٕ کھوٚل کران کران تِیٚتُھ پَچہِ پھِیرُ کوٚرمُت زِ پھٮ۪رنُک کلابو تہٕ نال چھُ بیزارٕ نٔرِس کُن واٹنہٕ آمُت تہٕ ییزارٕ نرٮ۪ن ہُند طِلہٕ چھُ پھٮ۪رنہٕ نالَس چھاونہٕ آمُت۔
شاید گژھن بوزَن وٲلۍ حضرات یہِ بوٗزِتھ حٲران زِ پوگلی یس منز چھِ سٕہس شال وَنان۔
کلس لوٚٹ وَنان تہٕ ماجہِ مٲلۍ وَنان۔
ییٚلہ زَن شالَس حۄشال، لٔٹِس لُٹ تہٕ مٲلِس بوب وَننہٕ چھُ یِوان۔
تہ زَن گو پوگلی بولن وٲلۍ وَنُن یژھن سٕہن کھیٚیہِ گٔب۔ 
تِم وَنَن “شالَن لٮ۪وۍ گٔبۍ کھٲلۍ“ تہٕ اگر تِمن وَنُن آسہِ زِ مےٚ چھُ کلس دود تِم وَنن “ می چھُ لوٚٹُس دَہ“۔ 
یتھے پٲٹھۍ اگر تِم کٲنٛسہِ پرٛژھن زِ چٲنۍ موج کوٚت گٔییِ- تِم وَننس “تیٖنۍ مٲلۍ کہوٚر گٔیہِ“۔
کشمیٖرَس چھِ کٲشِر زبٲنۍ منٛز کٔشیٖر تہٕ اَتہِ چہِ زبٲنۍ کٲشُر وَنان۔
اَمہِ زبٲنۍ ہنٛدۍ بولَن وٲلۍ چھِ کٔشیٖرِ علاوٕ کشتہٕ وارٕ- رام بَنہٕ- ریاسٖی بیترِ منٛز آباد۔
اَتھ چھُنہٕ کانٛہہ شکھ زِ شوٚد کٲشُر چھُ کٔشیٖرِ منزٕے وَرتاونہٕ یِوان۔
باقٕے علاقن منز چھِ اَمہِ زبٲنۍ ہنزٕ بولہِ بولنہٕ یِوان۔
یمن بولٮ۪ن پٮ۪ٹھ چھُ پہٲڑی اثر پیٛومُت۔
اَمہِ کِنۍ چھُ یہِ کٲشُر کٔشیٖرِ منز بولنہٕ یِنہٕ والہِ کٲشرِ نشہِ ہَن کھنٛڑ بیٚون۔
یِمن پہٲڑی بولٮ۪ن منز چھےٚ زٮ۪وِ ہیٚنۍ لایق کشتہٕ وٲرۍ - سرٲجی - پوگلۍ - رام بٔنۍ تہٕ ریاسی ہنزٕ بولہِ۔
کشمیری زبان اور شاعری“  ناوٕچ کِتاب لٮ۪کھن وٲلۍ عبدالاحد آزادن چھےٚ کٲشِر زبان اَکھ کرور انسانن ہنز زبان مٲنۍ مٕژ۔ 
سَرجارج گرٛیرسنَن چھُ ۱۹۱۱ء چہِ مۄردُم شمٲری مُطٲبِق کٲشُر تہٕ تَمہِ چہِ بولہِ بولن والٮ۪ن ہُند شمار دیٛتمُت۔
کٲشِر زبٲنۍ  ہندۍ علاقہٕ وٲدی تہٕ تمِکۍ جوٚنوٗبی تہٕ مشرقی نکھٕ نکھٕ علاقہٕ۔
جنوب مَشرِقس منز اَمہِ زبٲنۍ ہُند علاقہٕ چھُ کشتہٕ وارَس تانۍ ۔
جوٚنوٗبَس منز ویری ناگہٕ پٮ۪ٹھٕ پیٖر پَنچالَس تانۍ ۔
شُمالَس منز وورِ تانۍ۔ص
مشرقس منز پہلگام تہٕ جوٚنوٗب مغربس منز شوپینَس تانۍ پھٔہلتھ۔
کٲشِر زَبان کتھ زبٲنۍ خاندانَس سۭتۍ چھےٚ واٹھ تھَوان۔
اَتھ پٮ۪ٹھ کمَن کمَن زبانن ہُند اثر چھُ۔ 
اَمِیٛکُ آگر کیٛا چھُ۔
یہِ کٲژاہ پرٲنۍ چھےٚ۔
یِم سوال چھِ وُنہِ تہِ سانٮ۪ن ذیٚہنَن منز وۄتلان۔
اَتھ زبٲنۍ ہندِس اِرتقہس مُتلِق لِسٲنیٲتی مٲہِرَن ہنز راے کیٛا چھےٚ؟
یَتھ لیٚکھ مٔتِس منز دِمہٕ بہٕ ا۔تھۍ مَسلَس دَل۔
کٲشِرِ زبٲنۍ ہٕندِس ارتقاہَس مُتلِق چھےٚ یِمہٕ رایہِ پیش یِوان کرنہٕ۔
کٲشر چھےٚ درٕد خاندانٕچ زبان۔
کٲشر چھےٚ انڑوآریَن خاندانچَو زبانَو منزٕ سنسکٕرٛت منزٕ درٛامٕژ۔
کٲشِر چھےٚ عبرٲنۍ زبٲنۍ منزٕ درٛامٕژ۔
کٲشِر چھےٚ پشٲچۍ زبٲنۍ ہُند اَکھ روٗپ۔
دردِک خاندان زاننہٕ برٛونٛہہ چھُ یہِ زانُن ضوٚروٗری زِ دردُک مانے کیٛا چھُ ؟
گرٛیرسَن کیٛا چھُ اَتھ مُتلق وَنان۔
دردٕ لفظس پتہٕ چھےٚ اَکھ زیٖٹھ داستان۔
اَمہِ ناوُک چھُ اَکھ پرٛون قٔبیٖلہٕ ۔
سنسکٕرٛت اَدبَس منز چھِ یِم درٕد ناوٕ کِنۍ وَنہِ۔
پۄرانَن تہٕ رَزمیہِ ہَن منز تہِ چھِ یِمن “درٕد“ وَنان۔
خاصکٕرتھ “بھوِشیٛت پرٛانس“ تہٕ مہابھارتس“ منز چھےٚ اَمِچ ذِکر میلان۔
کلہن سٕنز “راج ترنگی“ منز چھ یِمن “دارَو“ وَنان۔
سہُ چھُ یِمن تَمہِ مُلکُک روزَن وول مانان ییٚتہِ أسۍ وُنۍ کٮ۪نس شِنز لَبان چھِ تہٕ یِمن از کل تہِ چھِ درٕد وَنان۔
دوٚیمٮ۪ن لفظن منز چھِ درٕد مُلکس تَل یِم سٲری پہٲڑی علاقہٕ ہِندوٗکُش بیٚیہِ ہندوستٲنۍ سرحدٕکۍ مٔنزِمۍ حِصہٕ ماننہٕ یِوان۔
وُنۍ کٮ۪نس چھُ یہِ علاقہٕ دردِستانہٕ کہِ ناوٕ مشہوٗر۔
یانے پامیٖرس تہٕ پنجابہٕ کِس شُمالَس تہٕ مغرِبَس دَدمیان پہٲڑی علاقہٕ چھُ دردِستانہٕ کہِ ناوٕ مشہوٗر۔
یوٚدوَے اَتھ سٲرِۍ سٕے علاقس منز دردٕے یٲتۍ بَسان چھِنہٕ تو تہِ چھِ اَتھ زٔمیٖنہِ ژکلَس منز سارِنٕے آریٲیی زبان بولن والٮ۪ن داردِک ناوٕ یاد کَران۔
ہُندستانہٕ کِس شُمال مغربی سرحدَس منز چھےٚ اکثر آریٲیی زبانن ہنز داردِک یا پِشٲچۍ زبان بولنہٕ یِوان۔
گلگت کِس علاقَس منز یۄسہٕ زَبان بولنہٕ یِوان چھےٚ تَتھ چھِ شِنا وَنان۔
شِنا زبٲنۍ ہندِ علاقُک رۄقبہٕ چھُ باہ ساس ترٛے ہَتھ تہٕ دُوَنٛزاہ میٖل۔
اَتھ چھُ تقریٖبَن ڈۄڈ لَچھ انسانہٕ بولان۔
شِنا زبٲنۍ ہٕندِس علاقس منز چھِ یِم علاقہٕ شٲمِل: تحصیلِ گلگت، ریاست نگرُک بوٚنِیٚمُ حِصہٕ، پنیال، داریَل، تانٛگیٖر، سِندکوٚہستان، چِلاس، گُریز وٲدی تلِیل، درٛاس، روٚندوٗ۔
شِنا زبٲنۍ چھےٚ ژور بولہِ۔
اگر أسۍ کٲشرِ زبٲنۍ ہندِس موٗلَس گژھَو أسۍ واتَو یَتھ نٔتیٖجَس پٮ۪ٹھ زِ کٲشِر زبان چھَنہٕ ویدِک سنسکٕرٛتس یا کلاسِکٔل سنسکٕرٛتَس نشہِ بیٚون۔
لِسٲنیٲتی مٲہِرَو چھِ کُنہِ زبٲنۍ بیٚیِس زبٲنۍ سۭتۍ ہِشر ماننہٕ کھٲترٕ پانٛژھ اوٚصوٗل کٔرۍ مٕتۍ۔ صوتِیاتھ، لفظیاتھ، صرف، نحو تہٕ مانیاتھ۔
أسۍ چھِ تقریٖبَن یِم سٲری اوٚصوٗل کٲشِرِ زبٲنۍ منز لَبان۔
کٲشِرِس چھُ سنسکٕرٛتَس سۭتۍ تیوٗت واٹھ یوٗت نَمس تہٕ مازَس چھُ۔
سنسکٕرٛتہٕ پٮ۪ٹھ آیہِ ہندُستٲنۍ زبانہٕ پرٛاکرِت اپٕبرٛمَش کِںۍ بیٚون بیٚون روٗپَن منز بَدلان۔
ییٚمیُک نتیٖجہٕ یہِ درٛاو زِ کینٛہہ لفٕظ آے کٲشِرِس منز پرٛاکِرٛت کِنۍ تہٕ کینٛہہ آے اَپٕبرٛمشہٕ کِنۍ۔
تِم بنیٚے کٲشِرِ زبٲنۍ ہٕندۍ اَژھیٚنۍ جُز۔
سنسکٕرٛتٕکۍ تَتسَم تہٕ تَدبھو ترٛٲوِتھ باقٕے لفٕظ آے پرٛاکرٛتہٕ تہٕ اَپٔبرٛمشہٕ کِنۍ کٲشِرِس منز۔
ییٚتٮ۪ن چھُ یہِ ضوٚروٗری وَنُن زِ تتسَم کیٛا گو تہٕ تَدبھَو کیٛا گو۔
تَتسَم گو سنسکٕرٛتَس ہیٚوٗہ۔
یُس روٗپ سنسکٕرٛتس منز آسہِ تیٛتھُے آسہِ کٲشِرِس منز تہَ۔
سنسکٕرٛتَس منز چھُ :- موٗلہٕ - ناسا - دوٗرَ - کرٛوٗرَ، سرپہَ، جِہوا، تالہَ - مالا، بالا بیترِ لفٕظ۔
کٲشِرِس منز تہِ چھُ یِمن لفظن سُے مطلب یُس سنسکٕرٛتس منز چھُکھ۔
تدبھَو“ گیہ سنسکٕرٛتہٕ منز درٛامٕتۍ۔
مثلَن سنسکٕرٛتکٮ۪ن گھِرٛتہَ - دُگدھ بیترِ لفظن بَنان چھُ گٮ۪و - دۄد بیترِ۔
سنسکٕرٛتکِس “چٹکہ“ لفظس بَنان چھُ پرٛاکرٛتَس منز “چَڑیہ“۔
چڑیہَ لفظَس بَنان چھُ کٲشرِس منز ژٔڑ - ژٔر۔
اُردوٗ ہندِیَس منز بَنان چھُ اتھ چڑا۔
سنسکٕرٛتُک “چنکہَ“ بَنان پرٛاکرِتَس منز ’چَنہَ اَ‘ سُے لفٕظ ک٠شرِس منز بَنان ’چَنہٕ‘ ہندی اُردوٗہَس منز چنا۔
سنسکٕرٛتُک ’نرتیٛہ‘ لفٕظ بَنان پرٛاکرٛتَس منز ’نَچَّہ‘، کٲشرِس منز بَنان اَتھ لفظس ’نژ‘، ہندی اُردوٗہَس منز اَتھ بَنان ناچ۔
سنسکٕرٛتکِس ’چھُ رِکا‘ لفظس بَنان چھُ پرٛاکرٛتَس منز چھُ ’رِآ‘ تہٕ کٲشرِس منز ’چھُرۍ‘ (ہندی اُردوٗہَس منز بَنان چھُس چھُری)۔
یِتھے پٲٹھۍ چھِ بیٚیہِ بیٚیہِ لفٕظ بَنان۔
اَپھبرٛمَش منز تہِ چھِ یتھے پٲٹھۍ لفٕظ بَنان۔
اَپھبرٛمَشکٮ۪ن لفظَن مثلَن کمہ - کاثہَ - چلّہِ - گنٹھِ - سدَّ لفظن چھُ ترتیٖب وار کٲشِرس منز بَنان کٲم - کونِ - ژۄل - گنٛڑ - سَداہ بیترِ۔
یِمَو مِثالَو تَلہٕ چھُ نَنان زِ تَتسم تہٕ تدبھَو، ترٛٲوِتھ چھِ کٲشِرٮ۪و لفظو پرٛاکرٛتٕکۍ  تہٕ ا۔پھبرٛمشٕکۍ روٗپ پرٛاٲوۍ مٕتۍ۔
ہَر گاہ أسۍ ویدِک دورَس نظر ترٛاوَو اَسہِ چھےٚ یہِ کتھ ٹاکارٕ باسان زِ کٲشِر زبان چھےٚ تیٖژ پرٛٲنۍ یوٗت ’رِگ وید‘ چھُ۔
بَدقٕسمتی کِنۍ  چھِنہٕ لسٲنیٲتی مٲہر اَمہِ کِس تَہس وٲتۍ مٕتۍ یِتھٕ پٲٹھۍ یوٗپ یِنہٕ کِنۍ دٔرۍ یاوُک ژوٚک چھُنہٕ صاف پٲٹھۍ لَبنہٕ یِوان تِتھے پٲٹھۍ چھُنہٕ تِمَن اَمِیٛکُ ژوٚک آسان پٲٹھۍ اَتھِ آمُت۔
ٮوقتہٕ وقتہٕ مختلف ثقافتی اثر کٲشِر زبٲنۍ پٮ۪ٹھ پٮ۪نہٕ کِنۍ چھُ اَمِیٛکُ آگُر کھٹنہٕ آمُت۔
ہندِٮ۪ن ہنزٕ حوٚکوٗمتھ ٲس کٔشیٖرِ منز تُرٛوٲہۍمہِ صٔدی تانۍ۔
اَتھ دورَس منز آسہٕ صرف ترٛے زبانہٕ چَلان - سنسکٕرٛت - پرٛاکرِت تہٕ کٲشِر۔
یِمن زبانٮ۪ن منز چھُ اَسہِ لِٹریچر تہِ میلان۔
تُرٛوٲہۍمہِ صدی منز چھُ اَسہِ شٮ۪تہٕ کنٹھُن ’مہانیہ پرٛکاش‘ میلان یُس کٲشرِ زبٲنۍ ہُند پرٛون نوٚموٗنہٕ ماننہٕ چھُ یِوان۔
ساسہٕ بٔدۍ ؤری گٔے أسۍ چھِ أنیٖکھ ویدِک لفٕظ کٲشِرِ زبٲنۍ منز تٔتھۍ آوازِ، تٔتھۍ روٗپس تہٕ تٔتھۍ مطلبَس منز وُنہِ تہِ استیمال کران۔
کلاسِکل سنسکٕرٛتَس تہٕ ویدِک سنسکٕرتَس منز چھےٚ سٮ۪ٹھاہ فرق۔ 
سنسکٕرٛتکِس “ویہَ“ لفظس چھُ مانے - عُمرٕ تہٕ جاناوار مگر ویدِک سنسکٕرٛتَس منز چھُ اَمہِ لفظُک مانے ’اناج یا غلہٕ‘۔
کٲشِرس منز چھُ ’ویہَ‘ لفظس یوٚہوٚے مانے۔
تَمہَ لفظس چھُ سنسکٕرٛتس منز “اَنہِ گَٹہٕ“ مانے۔
اَتھ لفظس چھُ کٲشِرۍ پٲٹھۍ  ’تَمُن‘ بنیومُت۔
مگر ویدِک سنسکٕرٛتَس منز چھُ اَتھ لفظس  مانے “شانٛش“  کٲشرِس منز چھُ اَتھ لفظس سُے مانے۔
مثلَن تٔمِس چھُ تَم۔
تۄکشَہ‘ لفظَس چھُ سُے مانے ویدِک سنسکٕرٛتس منز یُس کٲشِرس منز چھُ۔
تۄکشَہ‘ چھُ بنیٛومُت “تۄژھ“ مثلَن تَس چھَنہٕ کانٛہہ “تۄژھ“ ییٚتٮ۪ن چھُ یہِ قٲیدٕ ونُن ضوٚروٗری زِ سنسکٕرٛتٕکۍ “کٛشٲنٛت“ لفظ چھِ کٲشرِس منز ’چھانٛتَس‘ منز بَدلان۔ 
مثلَن تٔکشہ - پَکشَہ - رَکشہ - درٛاکشَہ - لفظن چھُ کٲشِرِس منز تَچھ - رَچھ - پَچھ - دَچھ بیترِ بَنان۔
پَوَ‘ چھُ ویدِک سنسکٕرٛتَس منز طاقتٕکِس مطلبَس منز استیمال یِوان کرنہٕ۔
کٲشرِس منز چھُ اَتھ لفظس یوٚہوٚے مانے۔
مثلَن تَس چھُ سٮ۪ٹھا اَتھٕ پَو، ویدِک ’بُدھہنہ‘ لفظس چھُ مانے “ژوٚک“ کٲشِرِس منز تہِ چھُس یوٚہوٚے مانے۔ 
بُدھہنہ‘ہَس چھُ بنیومُت “بۄن“ مثلَن بۄن مہٕ نَم۔
ویدِک ’یُداُؤے‘ لفظُک مانے چھُ “اگر“ اَتھ چھُ کٲشِرِس منز “یوٚدوَے“ بَنان۔
مثلَن یوٚدوَے سہُ گژِھ تور، ویدِک ’سِنہِ‘ لفٕظ چھُ سبزی ہندس مانِیَس منز استیمال سپدان کٲشِرس منز تہِ چھُ یہِ سُے مطلَب ہاوان۔
مثلَن ذےٚ کیٛا اوسُے سِیٛنُ۔
ویدِک “پُشیٛہ“ لفظس چھُ کٲشرِس منز پوش بَنان۔
ویدِک زبانہِ منز چھُ ’بھرٛشٹہٕ‘ لفظس مطلَب بوٚٹھ کٲشِرِ زبٲنۍ منز چھُ ’بھَرٛشٹہِ‘ لفظس ’بوٚٹھ‘ بَنان ییٚتٮ۪ن چھےٚ یہِ کتھ ژٮ۪تَس تھوٕنۍ لایَکھ زِ یمَن سنسکٕرٛت لفظن شِٹٲیا شِٹھٲ انٛدس چھِ تِم چھِ کٲشِرس منز ٹانٛتس یا ٹھانٛتَس منز بدلان مثالے سنسکٕرٛتُک اشٹہَ - مشِٹہ - اوشٹہَ روشٹہَ - چھُ ترتیٖب وار کٲشِرِس منز ٲٹھ - مِٹھٕ ووٚٹھ - روٗٹھ بَنان۔
ویدِک “پَلُشہِ“ لفظس چھُ مانے پِش۔
کٲشِرِس منز تہ چھُ أتھۍ مانِیَس منز استیمال سپدان۔
ویدِک ’سَنّہِ‘ لفظس چھُ مانے سوٚن۔
کٲشِرس منز چھُس یوٚہوٚے مَطلب مثلَن دٔرۍ یاو چھُ سٮ۪ٹھاہ سوٚن۔
ویدِک ’سنسک لفٕظ چھُ سفرٕکِس مطلبَس منز استیمال سپدان۔
کٲشِرس منز تہِ چھُ أتھۍ مانِیَس منز وَننہٕ یوان۔
ویدِک سنسکٕرٛتہِ لفظس چھُ کٲشُر سکھرُن بَنان مثالے سہُ سکھیوو تور۔
ویدِک زبٲنۍ منز چھُ ’جیٖر‘ لفظس مانے ’تُلُن‘ ، کٲشِرِس منز چھَنہٕ اَتھ کانٛہہ فرق۔
مثلَن تَس مہٕ دِ زیٖر۔
ویدِک ’تَپُس‘ لفظس چھُ مانے گرمی اَتھ لفظس چھُ کٲشرۍ پٲٹھۍ توس بَنان۔ مَثلن “توس وۄتھُم“۔
ویدِک زبٲنۍ منز چھُ “جنہِ“ لفظس “زنانہٕ“ مانے۔
أتھۍ لفظس چھُ کٲشِرس منز “زٔنۍ“ بَنان۔
سنسکٕرٛتَس منٛز چھُ “دیَہہ“ لفظس پان یا جِسٕم مانے، ویدِک سنسکٕرٛتَس منٛز چھُ اَتھ مانے ’بوٚٹھ‘، أتھۍ دیٚہَس چھُ بَنان دوٚہ مثلن “دٔہِس پٮ۪ٹھ بیٚہہ۔
ویدِک ’اوَ‘ برٛوٚنٛہہ لوٚگ چھُ آنٛکار کِس مَطلبَس منز استیمال سپدان۔
کٲشِرِس منز تہِ چھَنہٕ کانٛہہ فرق مثلَن اَوٕ سہُ گژِھ تور۔
ویدِک ’آدٕ‘ تہِ چھُ أتھۍ مطلبَس منز استیمال سپدان مثلَن اَدٕ بہٕ گذھٕ تور۔
ویدِک “ستھوٗرَ“ لفظَس چھُ مانے دوٚر - سَخٕت۔
أتھۍ لفظَس چھُ کٲشرۍ پٲٹھۍ بَنان ٹھورٕ مثلَن ٹھورٕ أڈِج مہٕ کھےٚ۔
ویدِک “ہڑّ“ لفظس چھُ مانے أڈِج۔
کٲشرِس منز چھُ اَتھ لَفظس “اَڈٕ“ بَنان۔
ییٚتٮ۪ن چھِ اَسہِ یہِ اوٚصوٗل یاد تھاوُں زِ سنسکٕرٛت لفظن ییٚتہِ “ہا“ آسہِ بُتھ تَتھ چھُ بَنان “ٲ“ مثلَن یَستہَ، یَسنہَ، ہَوٛلہَ، ہنٛسہَ۔
یِمن لفظن چھُ کٲشِرۍ پٲٹھۍ ترتیٖب وارٕ، اَتھٕ، اَسُن، اَلہٕ، اَنٛز بیترِ بَنان۔
اَمہِ علاوٕ ویدِک گرٛامرُک روٗپ تہِ چھُ کٲشِر زبٲنۍ منز لَبنہٕ یِوان مثلَن اَبَسٹریکٹ نوٕن بناونہٕ وزِ چھِ ویدِک زبٲنۍ منز “تَونَہ“ استیمال یِوان کرنہٕ مگر کلاسِکل سنسکٕرٛتَس منز چھِنہٕ أسۍ “شونہَ“ لگاوان تَتہِ چھِ تَویا تا لگاوان۔
کٲشِرس منز چھِ أسۍ ویدِک “تَونہَ“ استیمال کران ویدک “تونہ“ ہَس چھُ کٲشرِس منز تون بَنان مثلَن ہٲنٛز تون مہٕ کر۔
کھاندرس مَنز چھِ ازکَل تہِ ویدک سۄرَوسان کٲشرِ زنانہٕ وَنہٕ وان یۄسہٕ کٲشِرِس منز ویدِک عنصرن ہنز زندٕ مثال چھےٚ۔
یِمَو مثالَو تَلہٕ چھُ ٹاکارٕ نَنان زِ کٲشِر زَبان چھےٚ تیٖژ پرٛٲنۍ ییٖژ ویدِک چھےٚ۔
ویدِک زبٲنۍ ہندۍ أنیٖکھ لفٕظ چھِ اَسہِ نِش بیٚون بیٚون روٗپَن تہٕ شکلَن منز یِوان۔
رازٕ ویر چھُ اکھ پہٲڑی ضِلہٕ۔
اَمِکۍ زٕ تحصیٖل یانے رازٕ ویر تہٕ بُدیلہٕ چھِ پہٲڑی ییٚلہِ زَن ترٛیُم نوشہر تحصیٖل نیٖم مٲدٲنۍ چھُ۔
رازٕ ویر تہٕ بُدیلہٕ دۄنہٕ ؤنۍ تحصیٖلن منز چھِ کٲشُر بولٮ۪ن ۂنزِ سٮ۪ٹھاھ آبٲدی، اما پوٚز چھےٚ چٔھکرِتھ۔
صرِف خاص رازٕ ویرِ بھاروٹ، تھَنّہ، خاص بدیلہٕ تہٕ بیٚین علاقن منز چھےٚ کینٛژن جایَن سٮ۪ٹھاہ آبٲدی یک جا تہٕ باقٕے آبٲدی چھےٚ دۄنۍ ؤنۍ تحصیٖلن منز چٔھکرِتھ۔ 
رازٕ ویر ضِلَس منز چھِ پہٲڑی یا زمیٖندٲری گُجرۍ تہِ کٲشِر بوٗلۍ بولان، مگر پَزر چھُ یِزِ کٲشرِ ورٲے دۄن بولٮ۪ن ہُند چھُنہٕ کانٛہہ مسلَے تِکیٛازِ یِمن بولَن والٮ۪ن ہُند تیداد چھُ سٮ۪ٹھاہ تہٕ کانٛہہ مسلہٕ چھُنہٕ وۄتلان۔
ییٚلہ زَن کٲشُر بولن والٮ۪ن ۂنز آبٲدی جان آسنہٕ باووٚجوٗد یکجا چھَنہٕ تہٕ یتھٕ کٔنۍ چھُ اکھ خاص لسٲنی عمل تہٕ ردِ عمل چلہٕ وُن۔
بٔلۍ کہِ چھُ پَزر یِزِ کٲشِرس پٮ۪ٹھ چھُ بیٚین بولٮ۪ن ہُند اثر برابَر جٲری تہٕ یتھٕ کٔنۍ چھےٚ اَتِچ کٲشِر زبان دۄہہٕ پتہٕ دۄہہٕ پنہٕ نٮ۪و لفظَو تہٕ پننہِ اِملا نِشہ دوٗر گژھنہِ لٔجمٕژ۔
یہِ عمل  چھُ دۄیَو طرفَو جٲری۔
اَکھ یِزِ کٲشِرۍ بولن وٲلۍ چھِ دٔچھِنۍ کھوؤرۍ بدلیمتِس ماحولَس منز پننہِ ماجہِ زٮ۪وِ علاوٕ بیٚین بولٮ۪ن تہِ مدَد ہٮ۪وان تِکیٛازِ اَمہِ ورٲے چھُ مقٲمی لسٲنیٲتی عمل آوری نامکمل روزان۔
دوٚیُم یِزِ بیٚین بولٮ۪ن تہٕ زبانَن ہنز فطری رفتار چھ تیز تہٕ دٲیرٕ کُشادٕ تَوٕ کِنۍ چھُ یُہند اثر تہِ ژوٚر یٔمہِ کِنۍ کٲشِرِ زبٲنۍ ہندِس لفظٕ منز چھ غٲر کٲشِرۍ لفٕظ برابَر ہُرانتہٕ یتھٕ کٔنۍ چھُن یِمَو دۄشوٕے طرفٔو کٲشرِس نۄقصان واتُن ہیٚوتمُت۔
یہِ کتھ چھےٚ وَنٔنۍ لایق زِ کٔشیٖرِ نٮ۪بر علاقن ۂنزِ کٲشِرِ زبٲنۍ چھُ برٛونٛٹھٕے سٮ۪ٹھاہ کیٛنہہ راوُرمُت تہٕ یہِ کیٛنژھا بقایا اوس تَتھ چھُ تبدیلی ہُند سامانہٕ سپدان یِتھٕ پٲٹھٮ۪ن چھُ کٲشُر بولن والٮ۪ن ہندِ چٔھکرِتھ آسنُک یہِ نتیٖجہ درٛامُت زِ کٲشِرۍ چھِن غٲر کٲشِرۍ بَنٔنۍ ہیٚتۍ مٕتۍ۔
تِم خاندان یِم از برٛونٛہہ ترٕٛہ ؤری مقٲمی بولہِ ٲسۍ نہٕ ہٮ۪کان بوٗلِتھ تہٕ گرٕٛ گرٛٮ۪ٹس، دُکانس یا بازرَس منز یُہند کٲشُر لہجہ دوٗری بوزنہٕ اوس یِوان تہٕ یتھٕ پٲٹھۍ یہنز تہزیبی تہٕ لسٲنی انفرٲدۍ یتھ بٔچِتھ أس روٗزمٕژ تِمنٕے خاندانَن ۂنز نٔو پُے چھٔنہٕ ہٮ۪کان کھُلہٕ پٲٹھۍ کٲشُر کٔرِتھ یا چھِ کٲشُر کٔرِتھ یا چھِ کٲشُر بولنہٕ مندٕ چھان۔
تِمن چھُنہٕ کٲشِرس پٮ۪ٹھ دَسرس روٗدمُت تہٕ یتھٕ کٔنۍ چھِ تِم بلکُل بدلیٚمٕتۍ باسان۔
کُنہِ کُنہِ چھُ یہِ اثر تیوٗت سوٚن زِ تِہندِس مُلے کٲشِرۍ آسنس پٮ۪ٹھ چھُ شکھ گژھان۔
یہِ تبدیلی چھےٚ مختلف سطحن پٮ۪ٹھ لبنہٕ یِوان، تہِ زَن گوصوتی، لفظی تہٕ لہجی اثرٕ علاوٕ چھُ تہزیبی سطحن پٮ۪ٹھ تہِ اَمِیُک اثر نظرِ گژھان۔
رازٕ ویر تہٕ پرٛنیژھٕکۍ تٲلیٖم یافتہٕ کٲشرِس طبقس تام چھَنہٕ کٲشِر زبان پَنہٕ نِس نٔوِس رنگس روٗپَس منز واتان تہٕ نہ چھُ سہُ نَوٮ۪ن گرٛاین ترٛایَن تہٕ نٔوِس کٲشِرس رسمِ خطس وٲقف۔
یتھٕ کٔنۍ چھُ پٔرۍ مٔتٮ۪ن لیکھۍ مٔتٮ۪ن کٲشِرٮ۪ن ہندِ خٲطرٕ تہِ کٲشُر لٮ۪کھُن پرُن مشکل بنیومُت۔
نتیجہ چھُ یِزِ سہُ تہزیبی اتصال یُس کٲشِر زبٲنۍ ہندِس خطس منز موجوٗد چھُ سہُ چھُ دادِ اَکھ وۄپَر چیٖز بنیومُت تہٕ نہ چھےٚ تِمن کٲشِر زبٲنۍ سۭتۍ تہٕ اَمچہِ لکھایہِ سۭتۍ دلچسپی روٗزمٕژ۔
صوتیٲتی بٲریٖکیہِ تہٕ نزاکٔژیِمہٕ کٲشِرِ زبٲنۍ منز موٗجود چھےٚ تِمہٕ چھنہٕ تٔہنزِ وَتہِ گُزرے مٕژے یتھٕ پٲٹھۍ تہنٛز مقٲمی زبان بٲریٖک تہٕ پیچدار آوازٕ ادا کرنہٕ نشہِ مجبوٗر چھےٚ۔
اَتھ برعکس چھُ سہَل پسندی ہُند نتیٖجہ یہِ درٛامُت زِ بیٚین بولٮ۪ن کُن چھےٚ ترٛاے گرٛاے ہُرے مٕژ۔
ییٚتھٕ کٔنۍ گٔیہ لفٕظ ژھۄکان تہٕ خیال تہٕ تہند اظہار تہِ ژھۄٹان۔
اَوَے کِنۍ چھُ باسان زِ کٲشُر زَنتہِ چھےٚ اردوٗ زبٲنۍ ہنز اکھ بوٗلۍ۔
حالانکہ کٲشُر سمجُں تہٕ بولُن والٮ۪ن ۂنز چھَنہٕ کٔمی۔
دوٚیُم اثر یُس اَمہِ لفظہٕ تبدیٖلی سۭتۍ برابر ووٚجوٗدس چھُ لوٚگمُت چھُ لَبہٕ تبدیلی یۄسہٕ لفظن ہندِس صحٖی تلفظس سۭتۍ چھےٚ تولُق تھاوان۔
تلفظ صحٖی ادا نہ کرنہٕ کنۍ چھےٚ کٲشِرس تہٕ غٲر کٲشِرس فرق کرٕنۍ ناممکن گٔمٕژ۔
یتھٕ پٲٹھۍ چھےٚ رنگیٖنی تہٕ لفظن ہنز ادایگی متٲثِر سپٕز مٕژ۔
یٔمہِ کِنۍ وارٕ وارٕ زبٲنۍ نِشہ چھُ اَتھ پٮ۪وان چھَلُن۔
اَتھ پوٚت منظرس منز اگر بٲریٖکی سان وُچھنہٕ ییہِ۔
یہِ کتھ گژھِ صاف ظٲہر زِ کٲشِر زبٲنۍ ۂنزِ یہِ روبہٕ زَوال حالتھ چھےٚ اَمہِ کہِ مُستقبلٔچ صاف تصویٖر پیش کران۔
وارٕ وارٕ رونما گژھن واجیٚنۍ تبدیٖلی چھےٚ صاف نشاندہی کران کہ زوٗدیا بدیر، اگر زبٲنۍ ہُند تحفظ آونہٕ کرنہٕ تہٕ اَمہِ چہِ ترقی متلِق آونہٕ سونچنہٕ یہِ مَرِ پننہِ موتہٕ پانَے۔
یہِ زیوٗٹھ داستان مدِ نظر تھٲوِتھ چھُ پرٛوٛنژھ تہٕ رازٕ ویرِ منز کینٛہہ اقدام کرنُک ضوٚروٗرتھ۔
یم اقدام اند واتٕنۍ چھِ کٔشیٖرِ ہندٮ۪و علمی تہٕ ادبی ادارَن ہندِ مدتہٕ ورٲے مُشکل۔
کٔشیٖرِ ہُند تجربہٕ نٮ۪بٔرۍ ہیکہِ پرٛونٛژھ تہٕ رازٕ ویرِ فٲیدٕ واتنٲوِتھ۔
یِم اقدام ہیٚکن مختلِف نوعیتن ہندۍ ٲسِتھ۔
پٔزِس کُن اگر گژھو کشمیر کلچرل آرگنا یٔزیشن منظم سپدنہٕ برٛونٛہہ ٔس نہٕ زانٛہہ تہِ کانٛہہ اجتمٲعی کوٗشِش کرنہٕ آمٕژ ییٚمیٛکُ مقصد یہِ آسِہے زِ سٲنِس ریاستس اندر گٔژھۍ سٲری تِم أدیٖب، دٲنِشور تہٕ فنکار أکۍ سٕے تنظیٖمَس اندر جمع کرنہٕ ینۍ یِم کٲشُر بولن والٮ۪ن علاقن اندر چٔھکرِتھ چھِ۔
یہِ تنظیم تہِ یوٚدوَے وُنہِ ابتدٲیی مَرحلَو مٔنزۍ پکان چھےٚ، اما پوٚز اَمِیٛکُ ٲییٖن چھُ تِمن دوٗر دراز علاقن نمایندگی ہُند حق دِوان یِمن نہٕ وُنِیٛکُتام زانٛہہ تہِ پرٛژھنہٕ اوس آمُت۔
مثالے اُدہمپور، کٹھوا تہٕ پرٛونٛژھ وزارٕژنہندٮ۪ن کٲشُر بولن والٮ۪ن۔
۱۹۴۷ء برٛونٛہہ اوس نہٕ گۄڈٕ یہِ ممکنٕے زِ کُنہِ تَتھ تنظیٖمہِ یِیہِ ہے اجازتھ دِنہٕ یَتھ اَندر کُنہِ علاقٲیی زبٲنۍ ہندٮ۪ن نمایندن اَدبی شیٖرازٕ بٔندی کَرٕنۍ آسِہے۔
تہِ کیٛازِ ۱۹۴۷ء ہَس تام اوس وۄپر حوٚکوٗمتس یِژھن تنظیٖمن اندر خبر کیٛاہ تام “خطرناک منصوبہٕ“ درٛینٛٹھ یِوان۔
چناچہ اَمہِ ؤرۍ یہِ تہِ آونہٕ مرحوٗم پریم ناتھ پریٖسیس “انڑین پیٖپُلز تھیٹر“ ناوٕ کہِ ادارُک شاخ کٔشیٖرِ منز منظم کرنُک اجازتھ دِنہٕ تہٕ نہ آو تَس “بتہ ہر“ ناوٕ پٲتھٕر چارنُک اجازتھ دِنہٕ۔ 
لہازا وَنَو أسۍ زِ سانٮ۪ن اَدبی ستحریٖکن چھُ گۄڈ نِیٛکُ وَکانہٕ یہِ گوٚمُت زِ ہَتہٕ واد ؤرۍ یَن روٗدۍ کٔشیٖرِ منز حُکمران ؤزیٖر یِم پرٛتھ  کُںہِ کٲشِرِس تہزیٖبی چیٖزس نِچہِ نظرِ ٲسۍ وُچھان۔ 
أتھۍ وےٚ قدری ہندِس فہرستس منز ٲس کٲشِر زبان تہٕ کٲشُر ادب تہِ یِوان۔
لہازا ییٚلہِ ییٚلہِ کُنہِ اَدبی تحریٖکن کلہٕ تہِ کوٚڈ تَتھ آو اَکھ نتہٕ بیٛاکھ بَہانہٕ کٔرِتھ کلے پھُٹراونہٕ۔
مگر غوٚلٲمی ہندٮ۪و دورَو مٔنزۍ پکان پکان تہِ کٔرِ سانٮ۪و أدیٖبَو تہٕ دانِشورَو وَاریاہ کوٗششہِ زِ کٲشِر زبان تہٕ اَدب پھانٛپھلاونہٕ خٲطرٕ گوٚژھ کینٛہہ نتہٕ کینٛہہ کرنہٕ یُن۔
یِمہٕ کوٗشِشہِ آسہٕ اکثر اوقات غٲر مُنظم (مثالے کُنوہۍ مہِ صدی ہندِس ٲخرس اندر ترجمہٕ نِگٲری ہنزِ تحریک) یا آسہٕ موٚحدوٗد پٲٹھۍ شہرس اندر منظم ٲسِتھ تہِ کٲنٛسہِ لیٖڑرٕ سٕنز لیٖڑری چمکاونہٕ خٲطرٕ بناونہٕ آمژٕ۔
مگر ییٚلہِ أسۍ سارنٕے انفرٲدی تہٕ اجتمٲعٖی تحریٖکَن سام ہٮ۪مَو اَسہِ پیٚیہِ مانُن زِ اکثر تحریٖکو تہٕ تنظیٖمَو ترٛٲوۍ کینٛہہ تِتھۍ نِشانہٕ پَتھ کُن یِم سٲنِس اَدبی توٲریٖخس اندر بہرحال قٲبِل ذکر روزَن ۔
یِمن سارنٕے تحریٖکن ہُند ابتدا تہٕ انجام لٮ۪کھنہٕ برٛونٛہہ پاوٕ یہ تۄہہِ سٔتۍ مہِ صدی عیسوی ہُند اکھ قٕصہٕ یاد یٔمہِ تلہٕ یہِ نَنہِ زِ کٲشِرِ زبٲنۍ چھِ پرٛاکرٛتی عہدٕ پٮ۪ٹھے وکانہٕ باگہِ آمٕتۍ۔
مگر یہِ سخٕت جان زبان گٔیہِ نہٕ کُنہِ تہِ بَڑِ کھوٚتہٕ بَڑِ بِپتہٕ سۭتۍ تہِ فنا۔
قصہٕ چھُ یہِ زِ راجا جیاپیڑ درٛاو پننہِ راز دانہِ - اندر کوٹہٕ - دوٗر کُستام ملک زیننہِ تہٕ أمۍ سٕنزِ غٲر حٲضری اندر گو أمۍ سٕنزِ مَہرانہِ بقولِ مورخ حسن شاہ کُستام گورس سۭتۍ تہٕ بقولِ اوتار کشن رہبر کستام چۄبرس سۭتۍ عشٕق۔
یہِ عشقہٕ قصہٕ کوٚر کٔمۍ  تام کٲشِرۍ شٲیرن کٲشِرۍ پٲٹھۍ منظوٗم تہٕ۔
یہِ گو زبان زدِ عوام۔
راجہ ییٚلہِ واپس آو تہٕ أمۍ بوٗز کمہِ تام سۄنَر گرٕ أندرٕ (راتلہِ گردِش کران کران) زنانہِ ہُند یہِ قصہٕ تہٕ گٔنڑنَس ریٚہہ۔
صُبحٲے گو رَٹھ تہٕ ژَٹھ شوٚروٗع یَتھ اندر نہ صرف یہِ عشقہٕ موٚت بٔلۍ کہِ أمۍ سُند سورُے گورٕ قبیٖلہٕ تہِ قتٕل کرنہٕ آو۔
گورن ہاٹھ پھُٹرانہٕ خٲطرٕ کرِ راجا جیاپیٖڑن یہنٛزٕ ہتہٕ واد کتابہٕ یِمَو منزٕ اکثر سنسکٕرٛت زبٲنۍ منز لٮ۪کھنہٕ آسٕہن آمژٕ۔
أکۍ سٕے جایہِ جمع تہٕ ؤڈراوٮ۪ن یِمہٕ زٔمیٖنس اندر۔