KS-KAS-GEN-Roap BhaveenSHAISTAH RAMZAN-T=T0001=06.txt

یِہ کایا کُل چُھ موٗلس پٮ۪ٹھ دٔرتھ۔
موٗلس پٮ۪ٹھے چُھ کُل دٔرتھ کھسوُن تٕہ وسوُن شاہ چُھ اتھ سگ دِوان تٕہ یِہ چُھ یموٕے سۭتۍ پوچھر لبان۔
یِمےت چِھ اتھ لنگ لنجِہ پن تٕہ پوش  بخشان۔
 دراصل چُھ پران وایو شریٖرس زندٕ تھاوان تٕہ پوچھر بخشان۔
پوش چِھ برٕ گژھتھ میوٕ بننِہ لگان تٕہ اتھ میوس چُھ رس کھسنٕہ لگان۔
یتھِ کٔنۍ میوس چُھ دۄہ پتٕہ دۄہ رس تٕہ مزٕ ہُران۔
یِتھے پٲٹھۍ چُھ عٲرۍ فَس تٕہ عٔرۍفانچِہ وتِہ پٮ۪ٹھ رس تٕہ مزٕ ہُران۔
میوٕ تِہ چُھ پپان تٕہ ٲخرٕتس واتان۔
عٲرِف تِہ چُھ اتھ وتِہ پٮ۪ٹھ تٕہ مقاامس وٲتِتھ رٔسٕج حالتھ پراوان۔
یتھ کٔنۍ کُل میوٕ سۭتۍ چِھن ہٮ۪کان پرزٕنٲوتھ یتھے کٔنۍ چِھن ہٮ۪کان عٲرِف فانچِہ میچھرٕ سۭتۍ پرزٕنٲوتھ۔
کُل چُھ عٲرۍفٕہ سٕنز تشبیٚہہ پیش کران۔
عٲرِف چُھ لگاتار ریاضٕکِہ ذٔرۍ یِہ تتھ ابدی مٔدریرٕکِس مقامس وٲتِتھ سماد لگٲوتھ ناو ( آواز) تٕہ بِند (پھیوٗر) یانے شِو تٕہ شکھتی یا عٔلۍمکِس آگرس واتان۔
وننُک مطلب چُھ زِ یُتھ ہیوٗ عٲرِف چُھ سمٲز ہٕند زٔرۍ یِہ  ناد تٕہ بندٕکِس مقامس وٲتتھ عٔرۍفانکِس مقامس واتان ۔
پتٕہ چُھ سُہ اتھ تھنِہ پنتِہ فِکرِہٕندِ سۭتۍ کاران تٕہ امیُک سورُے کھۄچرع دوٗر کران تٕہ چُھ اتھ گٮ۪و بنان تیار۔
پتٕہ چُھ یِہ گٮ۪و یِہ عٲرِف یانے یِہ شۄد پرماتما رۭپۍ أگنس منز زالان۔
رۄپطہ بھوانِہ ہُند یِہ واکھ چُھ سٮ۪ٹھاہ سوٚن تٕہ مانے بوٚرُتھ۔
ٲخری دۄن مثرن منز چِھ سۄونُن یژھان زِ عٲرِف چُھنٕہ صرف تٔتھۍ ساونایِہ ( ریاضس ) پٮ۪ٹھ بس أمِس خُداین چُھ دان آسان کوٚرمُت تٕہ پتٕہ چُھنَس سونچ دیتمُت زِ ٹھیٖکھ کیا چُھ تٕہ ناکارٕ کیا چُھ۔
یتھ کٔنۍ چُھ سُہ گُررُس تٕہ تٔھنۍ ہٮ۪کان الگ الگ کٔرِتھ۔
ہُشٲر عٲرف چِھ  ہمیشہ پننِس آتما رۭپۍ تھنِہ سونچہ کہوچہ کھٲرِتھ امیک سورے مل دوٗر کران  تٕہ اتھ گٮ۪و بناوان۔
گٮ۪و بننٕہ پتٕہ چُھنٕہ اتھ بییٚہ کانہہ مقام روزان لیٚہازا چُھ سُہ آتما رۭپۍ گٮ۪وس پرماتما رۭپۍ نارس منز زٲلِتھ آواونٕہ کِہ ژٔکرٕ منز رِہا سپدان۔
پنُن پان پرزٕناونٕہ باپتھ لوگ میٚہ پننی آتمٕہ گیانک ( أندریم علم) یٔگٕنۍ کرُن۔
یتھ کٔنۍ اتھ یٔگنۍ نارس منز گٮ۪وٕچ آہُتی چِھ تراوان  یتھے کٔنۍ ترٲو میٚہ اتھ أگنس منز پنُن آتما۔
یِہ أگٕن پھٲلیوو میٲنِس انگس انگس منز تٕہ امِچ خۄشبوٗ پٔھہلیِیہ میٚہ پرٮ۪تھ طرفٕہ تٕہ میٚہ سپدیوو حقیقی علم حٲصِل۔
“انگن ہٕنز“ لفضن ہُند لۄغوی مانے چُھ “ وُسٕہ خانن ہٕنز“ مگر یِہ لفظ چُھ رۄپہ بھوانِہ کرٛمٕہ  ییٚندریِہ، گیانٕہ ییٚندرٮ۪یِہ تٕہ انتر آتما مانے یَس منز ورتوومُت۔
مقصد چُھ من، عقل تٕہ اہنکارس سۭتۍ اوسمُت۔
شوسوٗتر تٕہ وِگیانٕہ بھیرو“ یمن شیو درشن چن کتابن منز  تِہ چُھ “شریٖم ہوِ“ أتھۍ مانے یَس منز ورتاونٕہ آمُت۔
خپدایِہ سٕنز خُداوٚندی چُھ سُہ پانے زانان۔
 سُہ چُھ کرٛالٕہ سٕندۍ پٲٹھۍ یانے بانٕہ (آدم مٔرۍ) تُھران پانے پننی یژھنٕہ سۭتۍ یِمن پُھڑراوان بوزوے تٕہ کُس چُھ مران تٕہ کَس چُھ واتنٲوِتھ ہٮ۪کان۔
وۄں گۄو اگر کانہہ یتھٕ کٔنۍ سونچِہ زِ میہٚ مور فلٲنۍ تٕہ فلٲنِس واتنووُم تکلیٖف تس چُھ سُہ سورُے “ مایا برٛم“ نتٕہ چِھ یِم سٲری رنگٕہ وٲلۍ سٕندِس رنگ یِم سانِہ سونچٕہ نٮ۪بر چِھ۔
سُہ چُھ پانے یتھ عالمس منز مختلِف تہزیٖب پٲدٕ کران تٕہ پانے چُھ یِمن نیٖست نابوٗد کران ۔
یِہ چُھ تٔمِس نژَن واجنِہ ہٕندۍ پٲٹھۍ یۄسٕہ اتھ کامِہ منز نَہ چِھ زانہہ سوران تٕہ نَہ چِھس اتھ منز کانہہ رُکاوٹھ سپدان یانے اتھ منز نَہ چِھ سۄ سوران تٕہ نَہ چُھس یوان تھکھ۔
 ساتھ واکھس منز چُھ رۄپہ بھوانِہ خُدایِہ سٕندِ بجرُک تزکرٕ کوٚرمُت۔
کخُدایِہ سٕنز تخلیٖقِہ چُھ کرالٕہ سٕندۍ بانٕہ تُھرنِس سۭتۍ مشابہتھ دِتھ یِہ واکھ سٔہل آمُت بناونٕہ۔
ٹھیٖکھ امی قسمُک گیان چُھ بھگوان کرشنن ارجنس تِہ گیٖتایِہ منز ووٚنمُت۔
خُداین تھوو یتھ بُترٲژ پٮ۪ٹھ پرٮ۪تھ کُنِہ زُوٕ زٲژ ہُند بیٲلۍ ہُوٚل موٗجوٗد مثلن ٲنتھٕ روٚس مختلف قسمٕچہ زُوٕ زٲژ، اناج بیوٚن بیوٚن، رنگن قٕسمن تٕہ شکلن ہٕندۍ۔
 یِہ سٲرٕے تخلیٖق کٔرتٔمۍ تخلیٖق کارن پانے پننِہ سونچِہ سۭتۍ اتھ متلق پرژھ نٕہ تٔمۍ کٲنسِہ تِہ مشورٕ تٕہ نہ کوٚرُس اتھ منز کٲنسِہ مدتھ۔
لیٚہاذا چِھنٕہ کٲنسِہ تِہ پتاہ زِ تٔمۍ کیاہ کوٚر تٕہ کِتھٕ کوٚر۔
رۄپہ بھوانۍ چُھیٚہ یتِہ خُدایس سوال کران زِ اے خُدایِہ یِہ سٲرٕے کایناتھ کتِہ أنِتھ ژیٚہ؟
پتٕہ کتٕھ کٔنۍ چُھہکھ ژٕ یِم سٲری بیوٚن بیوٚن چیٖز یِہ کایناتھ اند واتنس سۭتۍ تٔتھۍ تۄتس (سُہ چیٖز  ییٚمِہ منز سٲرٕے کایناتھ تخلیٖق سپٕزمٕژ چھیٚہ) سۭتۍ رلاوان یِہ کتھ تٕہ چِھس بٕہ ژیٚہ پرژھٕنۍ یژھان۔
رگ ویدس منز تِہ چِھ ریٚشن یمے سوال منس منز وۄتلان تٕہ أتھۍ سوالس چھیٚہ رۄپہ بھوٲنۍ تٕہ شوٚدِس کٲشرِس منز بیان کران۔
یتھ سمسارس منز چِھ بھگوانٕہ سٕنزِے لیٖلا سٲرٕے، سُہ چِھ پانے زنمس یوان تٕہ پانے زنٕم لبان۔
پٲنۍ پانسٕے چُھس تسلاہ گژھان تٕہ چُھ واپٮس توٗرۍ گژھان۔
یتھ دُنۍ یِہس منز چُھ سُہ خۄش گٔژھتھ قٕسم ،قٕسمچہ کھیلٕہ گندان تٕہ پتٕہ یِہ سٲرے تخلیٖق واپس پانسٕے منز زم کران۔
گیٖتایِہ منز چُھ بھگوان کرشن ارجُنس کینہہ کالٕہ باپتھ پنُن وِراٹ سوٚروٗپ ہٲوِتھ یِہے کتھ فِکرِ تاران یۄسٕہ رۄپہ بھوانِہ یتھ واکھس منز ؤنۍ مٕژ چِھ۔
 امِہ تلٕہ چُھ باسان زِ تس تِہ آسِہے سُہ مقام حٲصِل سپُدمُت یُس کرشنٕہ سٕندِ میٚہربٲنی موٗجوٗب ارجنس کیٚہنس کالس نظرِ چُھ گژھان۔
یِہ خُدایِہ چُھ پانے ریاض کران تٕہ پانے ناد تٕہ بیٚند(پرانا یا مٕکۍ زٕ مقام ) اسِہ برۄنہہ کُن انان یا ہاوان۔
یا پانے چُھ سُہ ریاضُک مزٕ تُلان تٕہ پانے چُھ امچِہ م،ٔستی منز برٛہمٕہ رٔندرٕ تٕہ انا ہتٕکۍ ( پرانا یا مٕکۍ زٕ مقام) میٖٹھۍ ناو ( آوازٕ )بوزان یا کران۔
اتھ کتھِ تٕہ شن درشنن ( سٲنکھیٚہ، یوگ وغٲرٕ شیٚہ درشن) چُھنٕہ کانہہ تٕہ واٹھ یِہ چھیٚہ ریاضٕچ اکھ الگٕے وتھا۔
پٲنۍ پانے چُھ امِہ عٔلۍ مُک شراب چوان تٕہ پانے چُھ مس سپدان تٕہ أتھۍ مٔتِلِہ منز ییٚمِہ کایناتٕچ تخلیٖق کران تٕہ أتھۍ حالٔژ منز چُھ تنگ یتھ اتھ یِہ ناش تِہ کران۔
یانے یِہ چُھ پانے:کرُن، کہیٖں نٕہ کرن تٕہ کینژھا کرُن۔
 یِم ترشوے حالٔژ چِھ تس پانس تام۔
رۄپہ بھوٲنۍ چھیٚہ ونُن یژہان زِ یِہ حالتھ زانٕنۍ چھیٚہ الگٕے اکھ علم شیٚہ درشن مثلن۔
اکھ درشن ، وشیٖشِک درشن،نیاے درشن ،یوگ درشن ، پوٗروٕ میٖسامسا درشن تٕہ میٖما مسا درشن۔
فلاسفی ہٕندۍ یِم شنوے درشن تِہ ہٮ۪کن نٕہ امِہ حالٔژ ہُند تزکرٕ کٔرِتھ۔
 تِٕہ نہ ہیٚکِہ یِہ حالتھ بیان کٔرتھ۔
سادن تٕہ سنتن منز بِہِتھ پرزٕنوو میٚہ پنُن پان ۔
 أتھۍ پننِس ووٚجوٗدکِس رنگس منز پنُن پان رٔنگِتھ درایس بٕہ ییٚمِہ مایا موٗہکِہ آولنٕہ منز نٮ۪بر۔
تکیازِ  صحی علم حٲصِل سپدنٕہ پتٕہ چُھ اکُے گیان باقٕے روزان۔
وننُک مطلب چُھ یِہ زِ صحی علم حٲصِل سپدنٕہ پتٕہ چُھ صرف سُے یوت علم باقٕے روزان یُس ابدی چُھ باقٕے سٲری علم چِھ پتھر پٮ۪وان۔
رۄپہ یُس آوا گونک خوف اوس پانس منز سُہ کوٚرُنس تٔمۍ پانے دوٗر وۄنۍ نَہ چُھ میٚہ کانہہ چیٖز ژھارُن تٕہ نَہ گارُن تِہ کیازِ پنُن پان پرزٕناونٕہ پتٕہ  چُھنٕہ پرٛزٕناونُے کینہہ آسان۔
وۄنۍ نَہ چُھ میٚہ پٲدٕ سپدنُک غم تٕہ نَہ مرنُک۔
 نَہ روٗزٕم کانہہ پریشٲنی تٕہ نَہ کانہہ ہوس۔
ابببدی   عٔلۍ مچِہ وتِہ پکنٕہ وِزِ چِھ تریٚہ کھۄچر دوٗر کرٕنۍ آسان تِم چِھ ۱)جِسمٕکۍ ۲) لفظٕکۍ۳) منٕکۍ۔
سادن تٕہ سنتن ہٕندِ وساتطٕہ چِھ یِم تریٚہ کھۄچر دوٗر سپدان تٕہ صٔحی وتھ چِھ نظرِ گژھان۔
امِہ صٔحی وتِہ ہُند ٲخری مقام چُھ عٲرۍفس منز بیٚہ خوٗفی ہُند جزبٕہ پٲدٕ سپدُن۔
یِہ جزبٕہ چِھ تٔمۍ سٕے حٲصِل سپدان یُس ثٲبِت قدم آسِہ۔
اُپنشد تِہ چُھ یی ونان۔
اے خُدایِہ ژٕے چُھکھ بزاتِہ خۄد ( ساکار) دیان دٲرِتھ ییٚمِہ کایناتُک آسُن باس دِوان۔
ییٚلِہ یِہ سورُے کایناتھ گاش منز زم گژھِ یانے یمیُک ووٚجوٗد ختٕم گژھِ تیٚلِہ تِہ کرکھ ژٕے ییٚمیک ووٚجوٗد پانس منز زم یانے حالٔژ منز چُھکھ ژٕے ساکار تٕہ ژٕے لبکھ دۄٚیمِہ حالٕژ منز نراکارِ سُند رۭپھ تٕہ اتھ  حالٕژ منز روزِ یِہ زگتھ ژیٚہ منزلے۔
تٕہ یِہ گاش ( پرٛکاش) آسکھ ژٕ پانے۔
اتھ خاص عٔلۍ مس کُن وتٕہ ہاوُکھ روزِ چوٗنُے ظوٚہوٗر۔
 ٖییٚلِہ نٕہ یِہ عٲلِم تھنٕہ اوس پیومُت تیٚلِہ تِہ اوسُکھ ژٕے تٕہ ییٚلِہ یہتھ کایناتس ٲخرت واتِہ تیٚلِہ تِہ روزِ چوٗنُے ناو۔
یوٚہے خیال چُھ رگ ویدس منز تِہ سانٮ۪و پرانٮ۪و ریٚشَو بوومُت۔
فلاسفی ہٕندۍ یِم شنوے درشن تِہ ہٮ۪کن نٕہ امِہ حالٔژ ہُند تزکرٕ کٔرِتھ۔
صٔحی عٲرِف چُھنٕہ پننٮ۪و حٮ۪سو سۭتۍ دُنۍ یٲوی خٲہِش لور روزان۔
یِمٕہ خٲہِشہ پُر کٔرِتھ تِہ چُھ سُہ نٮ۪راہارٕے ( فاقےۭ روزان نَہ چُھ زانہہ نیٚندری آسان تٕہ نَہ زانہہ ہُشارے یانے نیٚندرِ ٲسِتھ تِہ چُھ سُہ ہُشار آسان تٕہ ہُشار ٲسِتھ تِہ چُھ سُہ نیٚندرِ آسان۔
سٲری کرم کٔرِتھ تِہ چُھ کرمٕہ پھلٕہ نشِہ الگ آسان۔
یتھۍ سٕے عٲرۍ فس چُھ پانس منز ووٚجوٗدِ وحدت ہمیشِہ پرٮ۪زلوُن روزان۔
رۄپہ بھوانِہ ہٕدند موٗجوٗب چُھ صحی عٲرۍفٕہ سٕنز یِہ پہنچان۔
سٲری دُنۍ یٲوی خٲہشٕہ پوٗرٕ کٔرِتھ تِہ  چُھنٕہ سُہ یِمن لور روزان۔
نیٚندرِ ٲسِتھ تِہ چُھ سُہ ہمیشٕہ ہُشار آسان۔
أمۍ سٕنز ہُشٲری چھنٕہ دُنۍ یٲوی لوٚہ لنگرس لول بران لیٚہازا چُھ سُہ دُنۍ یاہ نشِہ شوٚنگتھ آسان۔
سُہ چُھ پننِس أندٕرۍ وۄندس ہمیشٕہ سام ہٮ۪وان روزان ۔
لیٚہازا چُھ ہمیشٕہ ہُشار یِوان ماننٕہ۔
یُتھ عٲرِف چُھ کرم کران م گر امِہ کِس کرمٕہ پھلس چُھنٕہ لور روزان۔
عام انسان چُھ پوٗزا پٲٹھ یا نمازٕ وغٲرٕ پٔرِتھ پتٕہ امِہ سۭتۍ حۭصِل ثوابس پراران مگر یِہ عٲرِف چُھنٕہ یِمن کتھن لور روزان۔
لیٚہازا چُھ سُہ کرم کٔرِتھ تِہ اکرمہ آسان۔
شیو درشنس منز چِھ اتھ حالٔژ بھیروی مُدرا ونان تٕہ یِہ چُھ یمنٕے ترٮ۪ن کتھن اِشارٕ کران۔
میٲنِس دیانس (خیالس )منز تِہ چُھکھ ژٕے تٕہ میٲنِس أندرۍ وۄندس منز تِہ چُھکھ ژٕے۔
یتھ کٔنۍ ٲسۍ تن چٲنس تٕہ میٲنِس یتھ وحدتٕہ ووٚجوٗدس ( ادویت) نمسکار۔
میٲنۍ منن پرزٕنوو پنُن پان پانے تٕہ امیک علم حٲصِل سپدنٕہ سۭتۍ سپُدم خوٚشی حٲصِل۔
 یانے عٲرِف چُھ ریاض کٔرۍ کٔرۍ پنُن پان پرزٕناوٕنٕکِس مقامس  واتان تٕہ اوٚت وٲتِتھ وِسان۔
وۄں یُس اَزٲنۍ تٕہ اگیٲنی آسِہ تس اگر یِہ مقام حٲصِل سپدِ تِہ مگر تٔمِس سپدنٕہ امِہ سۭتۍ کانہہ خوٚشی حٲصِل تِہ کیازِ تس چُھنٕہ امِہ باپتھ کانہہ تٕہ ریاض آسان پیومُت کرن۔
تس چُھ ہنگٕہ منگٕہ یِہ بروٗنہہ کُھن واتان تٕہ میٚحنتٕہ بغٲر حٲصِل  سپٕزمٕژ کانہہ تِہ خۄٚشی چِھنٕہ روزوٕنۍ آسان۔
وننُک مطلب چُھ یِہ زِ میٚحنتٕہ تٕہ ریاضٕہ سۭتۍ حٲصِل کلوٚرمُت مققام چُھ زیادٕ مزٕدار تٕہ خوٚشی دنٕہ وول آسان۔
 اتھ مققابلس اگر یِہ مقام میٚحنتٕہ تٕہ ریاضٕہ بغٲر حٲصِل سپدِ تتھ منز چِھنٕہ سۄ خوٚشی آسان۔
خُدا صٲب چُھ پانے ییٚمِہ کایناتُک شہنشاہ تِہ تٕہ پانے چُھ سُہ مُفلَِس تِہ۔
سُہ چُھ پانے پوٗرۍکنۍ اختابٕہ (رَو) بٔنِتھ کھسان تٕہ پرٮ۪تھ کُنِہ چیٖزس منز رس کھالان۔
سُہ چُھ پانے کُنِہ جایِہ رے بٔنِتھ۔
فصلن ناش کران  تٕہ کُنِہ چُھ سُہ پانے پوٗرٕ پوٗرٕ فصٕل پوٚپرٲوِتھ نوٚموٗدار سپدان۔
کُنِہ چُھ پانے کُلٮ۪ن پٮ۪ٹھ مٮ۪ون ہٕندِس رۭپس منز نوٚموٗدار سپدِتھ پانے موٗرِتھ تِہ نوان یانے پانے چُھ تِم مٮ۪وٕ کھٮ۪وان تِہ۔
مطلب وننُک چُھ یی زِ یِہ کیژھا یتھ دُنۍ یہس پٮ۪ٹھ چُھ تِہ چُھ سُہ پانے۔
رۄپہ بھوانِہ ہٕنز یِہ کتھ شو سوٗترس سۭتۍ تِہ یتھے کٔنۍ واٹھ کھٮ۪وان۔
یُس عٲرِف پنُن پان پرزٕناونُک علم چُھ حٲصِل کران سُے چُھ وزٕدُن ژونگ ہیوٗ پنُن آتما ذٲنِتھ ہٮ۪کان۔
یُس عٲرِف ،آواز، چُھہہ، خوٗبصوٗرتی، مزٕ، مشُکھ تٕہ دُنۍ یٲوی لالٕچ یِمو شییٚو چیٖزو نشِہ پنُن پان تھوٚد کھالِہ سُےٖ ہیٚکِہ پنُن پان پرزٕنٲوتھ۔
یُس عٲرف پمیشِہ پننِس منس یِہ فکرِ تاران روزِ زِ خُدا چُھنٕہ پننِہ منٕہ ہٮ۪کان آتما پرزٕنٲوِتھ۔
وۄں یِمو نٕہ یمٕہ کتھٕ گارِ تِم چِھ زندٕ ٲسِتھ تِہ مۄردے تٕہ نتٕہ چِھ ذیٚہنی طور بٮ۪مار تٕہ چھنٕہ ہٮ۪کان سوٗنچِتھ۔
یتھ دُنۍ یِہس منز چُھ کھالٕے کانہہ سُہ عٲرِف یُس عٔلۍ مٕکِہ کھورِ سۭتۍ پننِہ جسمٕچ ناو ییٚمِہ دُنۍ یہکٕہ سوٚدرٕ منزٕ اپور تاران یانے موٗکھیٚہ حٲصِل کران۔
کینہہ موٗدۍ تٕہ کینہہ بے مارے“ اتھ ہیٚکِہ یتِہ مطلب ٲسِتھ زِ کینہہ گٔیِہ دُنۍ یِہس منز یِمن شن چیٖزن پتھ دیوانٕہ تٕہ لٔگۍ چھیٚیِہ تٕہ موٗدۍ۔
کینہہ روٗدۍ یہندِس دباوس تل تیوٗت زِ تِم سپٕدۍ  یِمن شن ہٕندۍ ذیٚہنی شکار زنتٕہ ٲسۍ بٮ۪مار۔
امِہ کتھٕ ہٕنز باوتھ چُھ کٹھو پنشد تِہ کران۔
دپانشارِکا بھگوتی چُھ رۄپہ بھوانِہ ہٕندِس رۭپس منز زنم ہیوٚتمُت تٕہ یتھ واکھس منز چُھ رۄپہ بھوانِہ أتھۍ کتھِ کُن اِشارٕ کوٚرمُت۔
میٲنِس یتھ مٔرِس تِہ پیوٚو شارِکا ماجِہ ہٕند مٔدرِ امرٮ۪تُک اکھ گوٚل مگر جُزوی طور پٮ۪نٕہ موٗجوٗب روٗد یِہ گۄڈ گۄڈ مایایِہ ہٕند آولنٕہ ؤلِتھ۔
مگر ییٚلِہ میٚہ منز پنُن حٮ۪س واپس آو تٕہ میٚہ وزنوو یِہ علم پانس منز تِہ دِژٕم أمِس ریاض رۭپۍ شرابچِہ چھکٕہ یُتھ زن یِہ پوٗرٕ پٲٹھۍ ہُشار گۄو۔
یتھٕ کٔنۍ وٲژٕس بٕہ أمۍ ریاضچِہ وتِہ پکان پکان واپس تٔتھۍ شارَکاریِہ رۭپس نکھٕ ییٚتِہ بٕہ درامٕژ ٲسٕس۔
وننُک مانے چُھ یی زِ بٕہ چُھس وۄنۍ بیٚیِہ تٔتھۍ شارکا رۭپس منز بیٚیِہ پرزلٕمژ۔
کینہہ رتُرکۍ عٲرِف چِھ نیٚبٕرۍ ژھژھ نش بے نیاز آسان مگر تِمن ہُند أندٕرۍ وۄندٕ چُھ ہمیشہ ریاضس منز مس آسان نیٚبٕرۍ نیٚبٕرۍٗ چِھ تِم عام انسان ہی آسان مگر دراصٕل  چِھ یِم وٲتۍ مٕتۍ آسان۔
اتھ حالٕژ منز چُھ عٲرِف أندٕرۍ وۄندٕکس سوٚدرس أندٕرۍ أندٕرۍ کھنان روزان تٕہ کُنرُک آبِہ حیات چنٕہ باپتھ تٔتی روزان۔
کینہہ عٲرِف چِھ کُنِہ بٮ۪مارِ منز مبتلا گژھنٕہ بغٲر ییٚمِہ عالمٕہ گژھان۔
یانے یِم آوار بیترِ چِھ آدمس پانس کُن لاقمٕہ  چاران تٕہ یتھٕ کٔنۍ چِھ یِم یِمن وٮ۪شِیَن ہٕندۍ بٮ۪مار گژھان۔
 مگر کینہہ عٲرِف روٗدۍ أتھۍ عالمِ مٔستی منز ییٚمِہ نٮ۪بر تِم زانہہ درایِہ نٕہ مگر پنُن پان پرزٕنانٕکِس مقامس وٲتۍ نٕہ زاہ۔
وُزوُکھ ناگ زاگِہ روٗدۍ تٔتی“ اتھ ہیٚکِہ سپدِتھ یتھ کٔنۍ تِہ مانے کُنڈ لیٚنی منز طاقتھ وُزٕ نٲوتھ چِھ تتھۍ طاقتس تٕہ تٔتھۍ مٔستی منز مگن روزان۔
 اتھ کُنڈلیٚنی چِھ تریٚہ حصٕہ۔
کھووُر گول دٲیِر اتھ  اتھ چِھ ونان “اِلا“ دٔچھن گول دٲیرٕ اتھ چِھ ونان “پنگلا“ تٕہ یِمن دۄن منز باگ چُھ اکھ نٲر آسان اتھ نٲرِس چِھ سُشمنا“ ونان۔
یمن ترٮ۪نوٕنۍ پٮ۪ٹھ چُھ اکھ نٲر آسان یتھ “ چِترٛنی نٲر“ ونان چِھ ییٚمِہ مٔنزۍ کُنڈلیٚنی ہُند طاقتھ وُزان چُھ۔
پرن پٮ۪نُک  صحی مقصد تِہ چُھ دراصل یوٚہَے۔
دراصٕل چُھ پرن پیٚون تٕہ جُکُن دُنۍ یٲوی ہاوٕ باو ابدی پزرس سۭتۍ چُھنٕہ اتھ کتھ کانہہ واٹھ۔
عام طور چُھ انسان نیٚبٕرۍ درٲوۍ ہاو باو کران۔
لیٚہازا چُھنٕہ امِہ سۭتۍ أندٕرۍ وۄندٕ بیدار گژھنُک سچاےٕ۔
أمۍی چُھ یِہ فضوٗل ماننٕہ یوان۔
مگر ییٚمِس عٲرۍ فس عرفان چُھ ح٠صِل آسان سُہ اگر جُکان تٕہ چُھ یا نمسکار تِہ چُھ کران سُہ چُھ تٔسۍ کُن جُکان تٕہ تٔسۍ نمسکار کران۔
یُتُھے عٲرِف عرۍفانچِہ وتِہ پٮ۪ٹھ پکان چُھ یا مقام عرۍفان حٲصِل سپدان چُھس تِتُھے چُھ سُہ (خُدا) تٔمِس عٲرۍفٕہ سٕنز ساریےٚ خٲہشِہ  تٕہ چاہتٕہ پانس منز لَے کران۔
عٲرۍفس چُھ پننِہ گاشِہ سۭتۍ گاشراوان ییٚمِہ سۭتۍ عٲرۍفٕہ سُند سورُے ووٚجوٗد گاشراونٕہ یوان چُھ ۔
أمۍ سُند جسم چُھ دزوٕنس آگنٕہ کۄنڈس ہیوٗ بنان ییٚمِہ بنان أمۍ سٕندۍ ترٮ۪نوے مل دٔزِتھ چِھ پٮ۪وان۔
یِہ چُھ پننِہ خوٚدی ہُند آبہ حیات حٲصِل کران تٕہ یِہ چتھ چُھ تس پنُن ووٚجوٗد تِہ مٔشِتھ گژھان ۔
یانےتس چُھ پننِہ جسمُک ووٚن مٔشِتھ گژھان۔
عٔرۍ فانچِہ وتِہ پٮ۪ٹھ یُس عٲرِف بیٚہ لوٗث پٲٹھۍ پکان چُھ تس چُھ پٔزۍ پٲٹھۍ  مقامس تا واتنس منز پانٕہ کُدا صٲبب تِہ اتھٕ روٚٹ کران۔
عٔرۍ فانٕچ وتھ چِھ دۄن نۄقطن ہٕنز أکِس پٮ۪ٹھ چُھ عٲرِف تٕہ بیٚیِس طرفٕہ تِہ أمس کُن پکان یتھ کٔنۍ چِھیہ یِہ وتھ یکدم طے گژھان۔
ییٚمۍ عٲرۍفن پنُن پان پرزٕنوومُت آسِہ سُہ چُھنٕہ اتھ مقامس پٮ۪ٹھ حٲصِل سپدان وول سۄکھ پانس تامٕے موٚحدوٗد تھاواون ۔
لیٚہازا یُس تِہ أمس عٲرۍفس تام واتان چِھ سُہ چُھ أمۍ سٕندِ سۭتۍ فٲض تُلان۔
یتھ کٔنۍ کانہہ تِہ کُل ژندن کُلِس نکھٕ روزنٕہ سۭتۍ مشکدار چُھ بنان تِتھے کنۍ چُھ کانہہ تِہ اگاٹل یا اگۄن انسان تِہ أمس عٲرۍ فٕہ سٕندِ سۭتۍ فٲض تُلان تٕہ وتھ لبان۔
صحی عٲرِۍ فٕپ سُند من تِہ چُھ أتی فکرِ تران۔
رۄپہ بھوانِہ ہٕنز یہِہ کتھ چِھ ابھنو گُپت سٕنز لیٚچھمٕژ کتابِہ پرٛتِہ بھگیا درشس سۭتۍ واٹھ کھٮ۪وان۔
زنم ہیووُنُے کوٚر میٚہ یِہ شریٖر ژیٚدرانندس ( منُک سوٚکوٗن یانے خُداے) حوالٕہ۔
یانے میٚہ تھوونٕہ جسمُک کانہہ مانِہ مطلب۔
پننِہ درمٕہ سۭتۍ وٲرِژس بٕہ اتھ مقامس تٕہ پرزٕنووُم سُہ آکار تٕہ جسامتٕہ بغٲر بڈ کھۄتٕہ بوٚڈ رۭپھ تِہ تھووُم منس منز۔
یتھعالمس منز یِہ کینژھاہ میٚہ وُچھ یا یتِہ نظر گوم یمن سارنٕے چیٖزن منز اوس چونُے (خُدایِہ سُند) عکس نظر گژھان۔
لیٚہازا روٚٹ میٚہ اشرف المخلوٗق سُند رۭپھ پننِس منس منز۔
سُہ چُھ یانے ژونگ تٕہ پانے چُھ تمیک پرٛکاش تِہ تٕہ وُشیز تِہ۔
سُہ چُہ پانے گاشِہ آگُر بٔنِتھ یتھ دُنۍ یِہس پھیران۔
میٚہ وُچھ سُہ حق کُل پانٕہ تٕہ ژومرووم پننِس آتماہس منز تِہ یتھٕ کٔنۍ پنُن پان تس حق کُلِس سۭتۍ۔
سُہ چُھ پنُن من قوبوٗ کران تٕہ پنُن پان گارنس منز راتھ دۄہ لگان۔
تس چُھ بیٚنٮ۪ر دوٗر گژھان تٕہ سُہ چُھ صرف پنُن پان پرزٕنانُک آبِہ حیات چوان روزان۔
ٲخرس چُھ تس سُہ ابدی شوٚعوٗر حٲصِل سپدان۔
رۄپہ بھوانِہ ہٕنز یِہ کتھ چھیہٚ بھگوت گیٖتایِہ منز تِہ درٕج۔
سُہ پروردِگار چُھ پانے علم  پانے چُھ سُہ اسمان  آواز تِہ چُھ پانے تٕہ موٗکھۍ تِہ چُھ سُہ پانے۔
سُہ چھے پانے پرٮ۪تھ جایِہ کٲنسِہ اتھٕ روٚٹ کرن وول۔
امِہ پتٕہ چھیٚہ رۄپہ بھوٲنۍ پٲنۍ پانس کُن ونان۔
اے میانِہ أندٕرۍ وۄندٕ پانک آسٕوٕنس رام سُند ناو پیٚہ تِہ کیازِ سُے چُھ شوٗژ۔
 سُہ چُھ بزاتِہ خۄد میٚہ منز تٕہ بٕہ چِھس پانٕہ تِہ تَسنُدے ظوٚہوٗر۔
بیشک ناو تٕہ نٮ۪ندٕکۍ مقام چِھ سٮ۪ٹھاہ تٔھدۍ مقام مگر یِمن تام واتُن نَہ چُھ مُشکِل تٕہ نَہ دُشوار۔
یوٚدوےعٲرِف پنٕنۍ اپٕز کھوکھٕر خوٚدی گالِہ تٕہ پننِٕس قبضس منز کرِ تٕہ ناد ہٮ۪ند (پرٛانا یامٕکۍ زٕ مقام یِم ابتدٲیی ماننٕہ چِھ یوان) چِھ تس برۄنہہ کُن پانے حٲضِر سپدان۔
امِہ پتٕہ چِھ رام تٕہ کرشن بیترِ سٲری اوتار برۄنہہ کُن یوان۔
یانے عٲرِفس چُھ پنُن پان تِہ تٕہ سٲرٕے   کایناتھ برۄنہہ کُن عیاں سپدان۔
عالم ووٚجوٗدس ینٕہ وِزِ اوس صرف بٮ۪ند (نۄقطٕ) موٗجوٗد پتٕہ آو ناد ( آواز) ظوٚہوٗرس منز۔
اَمی نادٕ منز سپُد عالمس منز شکھتی (طاقتھ) ہُنٛد ووٚجوٗد یتھٕ کٔنۍ چِھ عالمٕکِہ  ووٚجوٗدُک بٲنی ناو۔
یوٚدوے ناو نٕہ بٮ۪ند چھیٚہ  رۄپہ بھوانِہ شو تٕہ شکھتی رۭپس منز مٲنۍ مٕتۍ۔
تٔمۍ مہادیٖون ہیوٚت سٲنۍ سٕے رۭپس منز اوتار۔
 سُہ تٕہ بٕہچِھنٕہ دراصل زٕ بٔلۍ کِہ چِھ أسۍ کُنی۔
یوٚہے وجہہ چُھ زِ بٕہ چھس یتھ عالمچِہ مندورِ پٮ۪ٹھ پانس منز پوٗرٕ بٔنِتھ رام جی سُند سۄران۔
میانِہ خٲہشِہ چھیٚہ وۄنۍ بےٚروک تٕہ آزاد ییٚمِہ تِہ کُنِہ چیٖزچ نٕہ وۄنۍ خٲہشِ چھس کلران سُہ چیز پانے میٚہ نِش وٲتِتھ پٮ۪وان۔
یانے بیٖروٗنی دۄلابٕہ تٕہ لالٕچ ہٮ۪کن نٕہ میانِہ  وتِہ ہٕندۍ ٹٔھرۍ  بٔنِتھ تِہ کیازِ اکھ قطر ٲسِتھ تِہ چِھس بٕہ دراصل پانٕہ سوٚدُر۔
پانس نش بیوٚن نَہ آسٕوُن سُہ آتما ژھور میٚہ مختلِف دیٖشن تٕہ طرفاتن یانے میٚہ ژھور سُہ من مختلف زیارت گاہن تٕہ مندرن منز مگر لوٚبُم نٕہ کُنی۔
لیٚہازا اوٚن میٚہ منک خیال واپس پننِس رۭپس گرس نزدیٖکھ۔
پتٕہ کیاہ سپُد!یُتُھے میٚہ ریاضکِس ژھلس پٮ۪ٹھ پنپن من کھور تِتُھے سپد ییِہ مایا یِہ ہٕنز گٹٕہ دوٗر۔
یتھٕ کٔنۍ ژھل کھالنٕہ سۭتۍ گرٛٹٕہ چُھ لۄتان تٕہ تیزان یتھے کٔنۍ تیزیو میوٗن من تٕہ یِہ مایا یِہ ہُند تٕہ سمسارُک برٛم ہیوٚتُن ناشس گژھپن۔
یِم شنوے ( آوازٕ ، چھوٗہ،شکل،مزہ،مُشک تٕہ من) ہیٚتِن وارٕ وارٕ مٔشِتھ گژھٕنۍ۔
یِم شَنوَے مشنس سۭتۍ سۭتۍ سپُد میوٗن أندٕرۍ وۄندٕ بیدار۔
تس خُدایِہ سٕنز ٹھوس شکلا چُھنٕہ کُنی۔
کیا کُنِہ تِہ چھنا تَسٕنز ٹھوس شکٕل نظرِ گژھان۔
أے آدمٕہ! تلیا سٲری شاستٕر پھِرۍ تو کانہہ چھا ہیوٚکُمت تسُند ٹھوس ووٚجوٗد کُنِہ جایِہ ہٲوِتھ تٕہ بٲوِتھ۔
سُہ چُھ اکھ تیُتھ کُل یتھ گۄڈس تَل کوتاہ تِہ کھنو مگر امیُک موٗل  چُھنٕہ نظرِ گژھان۔
لیہازا چھیٚہ رۄپہ بھوٲنۍ ونان زٕ اے انسانٕہ اگر ژٕ ہُشار چُھکھ ژٕ دِتٕہ پننِس وۄندس ووٚن تٕہ أتۍ ما غژھی ژیٚہ سُہ  نظرِ۔
رۄپہ بھوٲنۍہ ہُند یِٕہ واکھ چُھنٕہ خُدایس ابدی پزرس تٕہ اپزِس سمسارس درمیان روزن وول کانہہ ٹھوس چیٖز مانان۔
 تس نش چِھ چُھ سُہ صرف ابدی پزریس نٕہ کانہہ گثڈ چُھ نہ منز تٕہ کانہہ اند۔
سُہ نَہ چُھ ژھارن جنگلن منز تٕہ نَہ بیابانن منز سُہ چُھ آدمس پننٕسے أندرٕۍ وۄندس منز موجوٗد ییٚتِہ سُہ پرزٕناوُن چُھ۔
یپٲرۍ تِہ چُھ شو پانے تٕہ ہُپٲرۍ تِہ چُھ سُہ پانے۔
شو چُھ شِوس پانے موٚدُر رس کھیاوان۔
یُس شِوس پانے پننِس وحدتس پننِہ مرضی سۭتۍ مختلف رنگن منز تقسیٖم کٔرِتھ تِمن منز لے روزان سُے شِو چُھ  سارنٕے پننِس رۭپس منز یِمن سارنٕے پوچھر بخشان۔
مون زِ  دوٚگنیار آسنمہ موٗجوٗب چُھ چون تٕہ میون لون الگ الگ۔
 مگر ابدی سفرٕچِہ وتِہ پٮ۪ٹھ چُھ چون تٕہ میون اکُے رۭپھ۔
یتھ واکھس منز چِھ شِو درشنٕکِہ ریاضٕکۍ پہلوٗ یکجا کرنٕہ آمٕتۍ۔
لیٚہازا چِھ یِمن واش کڈنٕچ ضوٚروٗرتھ۔
یتھ واکھس منز چِھ شِو درشنٕکہ ریاضٕکۍ پہلو یکجا کرنٕہ آمٕتۍ۔
لیٚہازا چِھ یِمن واش کڈنچ ضوٚروٗرتھ۔
شِو درشنس منز چِہنٕہ شوس تٕہ زیٖوس ( آدمس) منز کانہہ ٹاکارٕ فرق۔
تکیازِ شِو شکھتی تٕہ نَر چِھ دراصل أکی شکلِہ ہُند پٔھلاو۔
مگر ییٚلِہ یِہ مُنش پننِہ ریاضٕہ سۭتۍ واطپس تٔتھۍ حالتس واتان چُھ سُہ چُھ پانٕہ شِوٕے بنان۔
زیٖوس  زیوارس کھیوان۔
امِہ مثرُک چُھ یی مطلب۔